جموں۔ 23؍ جون:
مرکزی وزیر داخلہ جناب امیت شاہ نے سنٹرل فارنسک سائنس لیبارٹری (سی ایف ایس ایل) سامبا کا سنگ بنیاد رکھا اور جموں میں مختلف ترقیاتی اسکیموں کا افتتاح اور سنگ بنیاد رکھا۔قبل ازیں ڈاکٹر شیاما پرساد مکھرجی کے بلیدان دیوس پر امت شاہ نے تری کٹ نگر میں انہیں خراج عقیدت پیش کیا۔ سی ایف ایس ایل، سانبہ اور مختلف ترقیاتی اسکیموں کے افتتاح اور سنگ بنیاد رکھنے کے موقع پر جموں و کشمیر کے لیفٹیننٹ گورنر جناب منوج سنہا، مرکزی وزیر ڈاکٹر جتیندر سنگھ سمیت کئی معززین موجود تھے۔
امیت شاہ نے اپنے خطاب میں کہا کہ ڈاکٹر شیاما پرساد مکھرجی کی قربانی، ہمت اور عزم کی وجہ سے جموں و کشمیر ہندوستان کے ساتھ متحد ہے اور آرٹیکل 370 کو منسوخ کیا گیا ہے۔ انہوں نے کہا کہ ڈاکٹر شیاما پرساد مکھرجی نے 1953 میں آرٹیکل 370 کو شامل کرنے کی تجویز کے خلاف اپنے احتجاج میں صنعت اور سپلائی کے وزیر کے عہدے سے استعفیٰ دے دیا تھا اور ڈاکٹر مکھرجی نے کہا تھا کہ اس ملک میں دو ودھان، دو نشان، دو پردھان نہیں چلے گا۔
شاہ نے کہا کہ ڈاکٹر شیاما پرساد مکھرجی کے خواب کو پورا کرتے ہوئے، وزیر اعظم جناب نریندر مودی نے 5 اگست 2019 کو آرٹیکل 370 کو منسوخ کر دیا۔ انہوں نے مزید کہا کہ جموں و کشمیر سمیت پورا ملک ڈاکٹر شیاما پرساد مکھرجی کے تعاون کا مقروض رہے گا ۔مرکزی وزیر داخلہ نے کہا کہ آج جموں میں تقریباً 309 کروڑ روپے کی لاگت سے کئی ترقیاتی اسکیموں کا سنگ بنیاد رکھا گیا ہے۔ اس کے تحت 100 کروڑ روپے کی لاگت سے سی ایف ایس ایل، 157.47 کروڑ روپے کی لاگت سے رامبن اور کشتواڑ میں جل جیون مشن کے تحت 41 واٹر سپلائی اسکیمیں، 32.46 کروڑ روپے کی لاگت سے ڈوڈہ بس اسٹینڈ پر کثیر المنزلہ پارکنگ شامل ہیں۔ اس کے ساتھ ہی بخشی نگر میں 40.86 کروڑ روپے کی لاگت سے بون اینڈ جوائنٹ ہسپتال، 17.77 کروڑ روپے کی لاگت سے گرڈ سٹیشن اور 25 کروڑ روپے کی لاگت سے ڈوگرہ چوک سے کے سی چوک تک سڑک کی اپ گریڈیشن کا بھی افتتاح کیا گیا۔
امیت شاہ نے کہا کہ وزیر اعظم جناب نریندر مودی کی قیادت میں جموں و کشمیر ترقی کی راہ پر گامزن ہے۔ انہوں نے کہا کہ گولڈن ہیلتھ کارڈز کی تقسیم کا پروگرام بھی آج مکمل ہو گیا ہے۔ تقریباً 97 لاکھ لوگ اس گولڈن ہیلتھ کارڈ کا فائدہ حاصل کر رہے ہیں۔ جناب شاہ نے کہا کہ پورے ملک میں پردھان منتری آیوشمان بھارت یوجنا کے تحت صرف غریب لوگ ہی فوائد حاصل کرتے ہیں، جب کہ جموں و کشمیر میں وزیر اعظم جناب نریندر مودی نے تمام لوگوں کو 5 لاکھ روپے تک کی تمام صحت کی سہولیات مفت فراہم کرنے کا فیصلہ کیا ہے۔
جموں و کشمیر حکومت اس اسکیم کے تحت روزانہ 2 کروڑ روپے کی ادائیگی کر رہی ہے۔ امیت شاہ نے کہا کہ حال ہی میں سرینگر میں G-20 چوٹی کانفرنس کا کامیابی سے انعقاد کیا گیا۔ انہوں نے کہا کہ اس کانفرنس میں کئی ممالک کے رہنما کشمیر کی اچھی سیاحت کا پیغام لے کر گئے اور کشمیر کی بہتر صورتحال کا پیغام پوری دنیا تک پہنچا۔ جناب شاہ نے کہا کہ وزیر اعظم جناب نریندر مودی کی قیادت میں حکومت نے جموں و کشمیر میں پنچایتی راج نظام کو دوبارہ نافذ کیا ہے۔ اس وقت 32,000 نو منتخب پنچ، سرپنچ اور تحصیل پنچایت اور ضلع پنچایت کے ممبران ہیں، جو جموں و کشمیر کو ترقی کی راہ پر آگے لے جا رہے ہیں۔ انہوں نے کہا کہ 70 سالوں میں صرف 4 میڈیکل کالج بنائے گئے، گزشتہ 9 سالوں میں 9 نئے میڈیکل کالج اور 15 نرسنگ کالج بنائے گئے۔ پہلے میڈیکل کی صرف 500 سیٹیں تھیں، اب اس میں ایم بی بی ایس کی 600 سیٹیں شامل کر دی گئی ہیں۔
ڈگری کالجوں اور انجینئرنگ کالجوں کی تعداد بھی 96 سے بڑھا کر 147 کر دی گئی ہے اور جموں کو آئی آئی ٹی اور آئی آئی ایم فراہم کیے گئے ہیں۔ انہوں نے کہا کہ حال ہی میں جموں و کشمیر میں تروملا تروپتی دیوستھانام مندر کا بھی افتتاح کیا گیا ہے۔
