لیہہ/لداخ میں منعقدہ پیس واک کے اختتام پر لداخ میں بدھ بھکشوؤں نے وزیر اعظم نریندر مودی کی دنیا میں امن کی کال کی تعریف کی اور ہندوستان میں بدھ مقامات کی ترقی کے لیے ان کا شکریہ بھی ادا کیا۔ امن اور ہم آہنگی پھیلانے کے مقصد کے ساتھ تین روزہ عالمی امن کانفرنس اور پیس واک لداخ میں اختتام پذیر ہوگئی۔
اس تقریب میں بدھ راہبوں اور عقیدت مندوں اور مقامی لوگوں نے شرکت کی۔ اس موقع پر 10 نکاتی لداخ امن اعلامیہ پر بھی دستخط کیے گئے۔ اس تقریب کا مقصد دنیا میں امن اور ہم آہنگی کو فروغ دے کر اتحاد اور یکجہتی کا پیغام پھیلانا تھا۔ آج کی عالمی جنگوں، دہشت گردی، اتھل پتھل اور طرح طرح کے تشدد، خانہ جنگیوں اور چیلنجز نے دنیا کو بدامنی، بداعتمادی اور تناؤ کی کیفیت میں ڈال دیا ہے۔
تمام عالمی طاقتیں قدرتی وسائل، مذہبی مسائل اور ہر چھوٹی موٹی چیز کے لیے تشدد کا سہارا لے رہی ہیں۔ یہ بنی نوع انسان کے لیے لمحہ فکریہ ہے۔ امن اور ہم آہنگی کی اہمیت ایسے مواقع پر اور بھی بڑھ جاتی ہے۔ بین الاقوامی کانفرنس میں مختلف ممالک کے گرو اور نامور علماء اکٹھے ہوئے اور ایک پلیٹ فارم پر اپنے خیالات کا اظہار کیا۔ اس کانفرنس میں تقریباً سات ممالک کے بدھ راہبوں اور عقیدت مندوں نے شرکت کی، جہاں اس بات پر غور کیا گیا کہ بدھ مت کے فلسفے اور نظریے کی مدد سے عصری عالمی چیلنجوں سے کیسے نمٹا جائے۔
مہابودھی انٹرنیشنل میڈیٹیشن سینٹر لداخ کے زیر اہتمام، اس پروگرام میں تھائی لینڈ، نیپال، ویتنام، سری لنکا، بھوٹان اور ریاستہائے متحدہ امریکہ جیسے ممالک کے شرکاء شامل تھے۔ انڈین مینارٹی فاؤنڈیشن (آئی ایم ایف)کے کنوینر ستنام سنگھ سندھو سمیت مختلف مذاہب کے تقریباً 2500 رہنماؤں، عقیدت مندوں اور نامور علماء نے شرکت کی۔ اس سے پہلےدعائیں اور امن کے پیغامات لے کر، بدھ راہبوں کی ایک بڑی جماعت نے دیگر عقیدت مندوں، دیگر مذہبی برادریوں کے رہنماؤں اور طلباء کے ساتھ لداخ میں اتوار کو عالمی امن اور ہم آہنگی کو فروغ دینے کے لیے امن واک کی۔
انڈین مینارٹی فاؤنڈیشن (آئی ایم ایف)نے بھی شرکت کی۔ مہابودھی انٹرنیشنل میڈیٹیشن سینٹر ، لیہہ، لداخ کے بانی اور صدر بھیکھو سنگھاسینا نے کہا، "پوری دنیا بہت سے چیلنجوں سے گزر رہی ہے۔
اسے ایک عظیم لیڈر کی ضرورت ہے… جو پوری دنیا میں امن اور ہم آہنگی اور دوستی لا سکے۔ اور وہ ہمارے وزیر اعظم نریندر مودی ہیں جو خود کرمیوگی ہیں۔ انہوں نے کہا کہ ہندوستان کی خوش قسمتی ہے کہ ایسا عظیم لیڈر ہے جو روحانی اقدار جیسے یوگا، مراقبہ اور واسودھائیو کٹمبکم کو یکجا کرتا ہے۔
