سری نگر، یکم اگست :
جموں وکشمیر کے پولیس سربراہ دلباغ سنگھ کا کہنا ہے کہ وادی کشمیر میں ملی ٹنسی کم ضرور ہوئی ہے لیکں پوری طرح سے ختم نہیں ہوئی ہے۔انہوں نے کہا کہ ابھی بھی کچھ ایسے عناصر یہاں موجود ہیں جو امن کے ماحول کو خراب کرنے کی کوشش کرتے ہیں۔ان کا کہنا تھا کہ جو فوجی جوان لاپتہ ہوا ہے اس کی تلاش جاری ہے۔
موصوف پولیس سربراہ نے ان باتوں کا اظہار منگل کے روز یہاں جموں وکشمیر پولیس شہدا کے 19 ویں ٹورنامنٹ کے اختتام پر نامہ نگاروں کے ساتھ بات کرنے کے دوران کیا۔انہوں نے کہا: ‘ملی ٹنسی کم ہوئی ہے لیکن ابھی مکمل طور پر ختم نہیں ہوئی ہے ابھی بھی یہاں ایسے عناصر موجود ہیں جو امن میں رخنہ ڈالنے کی کوشش کررہے ہیں لیکن ان کے خلاف سخت کارروائیاں کی جا رہی ہیں’۔
کولگام کے لاپتہ فوجی جوان کے بارے میں پوچھے جانے پر ان کا کہنا تھا: ‘فوجی جوان کے لاپتہ ہونے کی رپورٹ آئی ہے پولیس اور سیکورٹی فورسز تلاش کر رہے ہیں’۔
انہوں نے کہا: ‘ہم امید کرتے ہیں کہ وہ صحیح سلامت ہونا چاہئے مگر ابھی تک ہمیں کوئی خاص جانکاری حاصل ہوئی ہیں کچھ اہم لیڈز پر سیکورٹی فورسز کام کر رہے ہیں’۔
دفعہ 370 کی تنیسخ کے بعد حالات کے بارے میں بات کرتے ہوئے مسٹر سنگھ نے کہا: ‘تبدیلی نمایاں ہے کیونکہ ایسےعلاقے جہاں جانے سے لوگ ڈرتے تھے وہاں آج سیاح آتے ہیں امن و قانون میں رخنہ ڈالنے کا شاید ہی کوئی واقعہ پیش آتا ہے’۔
انہوں نے کہا کہ ملی ٹنٹوں کی تعداد بہت کم ہے اور آج سیاح ڈائون ٹائون کی سیر کرکے اس کی خوبصورتی کی تعریفیں کرتے ہیں۔
ان کا کہنا تھا: ‘وادی میں سیاحوں کا غیر معمولی رش ہے شری امرناتھ یاترا پر امن طریقے سے چل رہی ہے اور اس کے علاوہ سری نگر میں 34 برسوں کے بعد محرم جلوس بر آمد کیا گیا جس سے صاف ظاہر ہوتا ہے کہ لوگ امن کے ماحول میں سانس لے رہے ہیں’۔
نارکو ٹیرر کے بارے میں پوچھے جانے والے ایک سوال کے جواب میں پولیس سربراہ نے کہا: ‘نارکو ٹیرر کے خلاف ہماری کارروائیاں ثمر آور ثابت ہو رہی ہیں سال گذشتہ سرحد پر قریب بیس نارکو ٹیرر ماڈیولز کو تباہ کیا گیا’انہوں نے کہا کہ جنوبی کشمیر میں غیر ملکی جنگجوئوں کی موجودگی کے بارے میں اطلاعات ہیں جن کو ٹریک کیا جا رہا ہے۔
قبل ازیں ان کا اپنے خطاب میں کہنا تھا: ‘نوجوان لڑکوں اور لڑکیوں کا فٹ بال میں دلچسپی اور جوش و جذبہ دیکھ کر میں بہت خوش ہوا’۔انہوں نے کہا کہ ڈائون ٹائون کے نوجوانوں میں صلاحیتوں کی کوئی کمی نہیں ہے اور پولیس ڈائون ٹائون میں ایک بڑے ایونٹ بہت جلد اہتمام کرے گی۔
