سری نگر،21جولائی:
جموں وکشمیر میں کورونا کیسز کی تعداد میں روز افزوں غیر معمولی اضافہ درج ہو رہا ہے۔جمعرات کے روز مزید 505 افراد کی رپورٹ مثبت آئی۔
سرکاری ذرائع نے بتایا کہ جمعرات کے روز جموں وکشمیر میں 505 افراد کی رپورٹ پازٹیو آئی جن میں سے 277 جموں صوبے سے اور 288 کشمیر ڈویژن سے آئے ہیں۔اعدادو شمار کے مطابق سری نگر ضلع میں 144، بارہ مولہ میں 38،بڈگام چھ، پلوامہ میں دو، کپواڑہ میں 23، اننت ناگ میں تین ، بانڈی پورہ میں پانچ، گاندربل یں دو ، کولگام میں چار، اور شوپیاں میں ایک کی رپورٹ مثبت آئی۔
جموں ضلع میں جمعرات کے روز 2 سو افراد کی رپورٹ مثبت آئی، ادھم پور میں 25، راجوری میں پانچ، ڈوڈہ میں پانچ، کٹھوعہ میں چودہ ، سانبہ میں چھ، کشتواڑ میں گیارہ ، پونچھ میں آٹھ اور ریاسی میں تین افراد میں کورونا وائرس پایا گیا۔
سرکاری ذرائع نے مزید بتایا کہ جمعرات کے روز 152مریض صحت یاب ہوئے ہیں۔جموں وکشمیر میں کورونا کے یومیہ معاملات میں غیر معمولی اضافہ کے پیش نظر حکومت نے سبھی اضلاع میں عوامی مقامات پر ماسک کو لازمی قرار دیا ہے۔چونکہ اس وقت وادی کشمیر میں شادی بیاہ کا سیزن جوبن پر ہے جس وجہ سے کورونا کے یومیہ معاملات میں مزید اضافہ کا امکان ہے۔
ڈاکٹروں نے لوگوں کو مشورہ دیا ہے کہ وہ شادی بیاہ کی تقریبات، بھیڑ بھاڑ والے مقامات پر جانے سے گریز کریں ۔طبی ماہرین کے مطابق جموں وکشمیر میں پچھلے چار روز سے کووڈ کے یومیہ کیسز میں لگ بھگ ساٹھ سے ستر فیصد کا اضافہ ہوا ہے جس کے پیش نظر احتیاطی تدابیر پر عملدرآمد ناگزیر ہے۔
