سرینگر،23جولائی:
جموں و کشمیر کے ضلع سرینگر کے رعناواری علاقے میں بیتی رات آتشزدگی کے ایک ہولناک واقع میں تین منزلہ عمارت مکمل طور پر خاکستر ہوئی۔ تاہم آگ کی اس واردات میں کسی جانی نقصان کی کوئی اطلاع نہیں ہے۔ پائین شہر کے رعناواری علاقے میں بیتی شب قریب 12 بجے ایک تین منزلہ عمارت میں اچانک آگ بھڑک اٹھی۔ جس کے نتیجے میں عمارت مکمل طور خاکستر ہوئی۔
لیکن بتایا جارہا ہے کہ فائر اینڈ ایمرجنسی سروسز نے بروقت کارروائی عمل میں لاکر آگ کو مزید پھیلنے سے روکا۔ اس بڑے رہائشی مکان میں چار خاندان رہائش پذیر تھے۔ ایسے میں غلام رسول شاہ، فیاض احمدشاہ، نذیر احمد اور نور محمد شاہ کے کنبے بے گھر ہوگئے ہیں۔
آگ لگنے کی وجوہات کا ابھی پتہ نہیں چل سکا ہے البتہ پولیس نے کیس درج کر کے تحقیقات شروع کر دی ہے۔ واضح ریے 21 جولائی کی صبح شہر خاص کے گنجان آبادی والے علاقے خانیار میں بھی اسی طرح کی آگ کی واردات رونما ہوئی جس کی زد میں آکر دارالعلوم اسلامی سمیت 3 مکانات اور ایک میرج ہال خاکستر ہوئے۔
