شملہ،23اگست :
بالی ووڈ کے مشہور اداکار انوپم کھیر کا کہنا ہے کہ’دی کشمیر فائز‘ کو آسکر ایوارڈز کے لیے بھیجے جانے سے روکا جا رہا ہے۔ انہوں نے کہا کہ ہندی فلم انڈسٹری کے کچھ بڑے لوگ کہتے ہیں کہ یہفلم آسکر ایوارڈز میں نہیں جانی چاہیے جو کہ انتہائی افسوسناک ہے۔ کچھ لوگوں نے کشمیر فائلز کا بائیکاٹ کرنے کی کوشش بھی کی لیکن یہ فلم سب سے زیادہ چلی ہے اور لوگوں نے اسے بہت پسند کیا ہے۔
اداکار انوپم کھیر پیر کے روز یہاں پریس کلب آف شملہ میں میٹ دی پریس پروگرام سے خطاب کر رہے تھے۔ انہوں نے کہا کہ ہندوستان سے زیادہ روادار دنیا میں کوئی دوسرا ملک نہیں ہے۔ اظہار رائے کی جتنی آزادی ہندوستان میں ہے کسی اور ملک میں نہیں ہے۔
لال سنگھ چڈھا کے فلاپ ہونے پر کھیر نے کہا کہ اچھی فلم اپنا راستہ خود تلاش کرتی ہے، اگر فلم اچھی ہوتی تو فلاپ نہ ہوتی۔ انہوں نے کہا کہ لوگوں کو فلم کا بائیکاٹ کرنے کا حق ہے، اسے کہتے ہیں آزادی اظہار۔ لوگوں کو فلم اچھی لگے یا بری، یہ لوگ خود فیصلہ کرتے ہیں۔ ایسے میں بائیکاٹ کا جو ٹرینڈ چل رہا ہے، وہ ایک طرح سے درست ہے۔
عامر خان کی جانب سے سال 2015 میں عدم برداشت پر دیے گئے بیان پر انہوں نے کہا کہ ایسے بیانات کسی بھی شخص کو سوچ سمجھ کر دینے چاہئیں، کیونکہ پورا ملک ان سے جڑا ہوا ہے۔ حالانکہ انہوں نے کہا کہ عامر خان اچھے انسان ہیں۔ وہ بھی میرے پسندیدہ اداکاروں میں سے ایک ہیں۔ وہ بہت اچھے اداکار ہیں۔
اس کے ساتھ ہی بالی ووڈ میں ایوارڈ واپسی مہم کے بارے میں پوچھے گئے ایک سوال میں اداکار انوپم کھیر نے کہا کہ پچھلے سات سالوں میں یہ ایوارڈ واپسی گینگ فلاپ ہوا ہے۔ ملک کے عوام کو ایسے لوگوں سے کوئی سروکار نہیں۔ انہوں نے کہا کہ آرٹیکل 370 کی منسوخی کے بعد کشمیر میں کافی بہتری آئی ہے۔ اداکار کھیر نے کہا کہ وہ شملہ میں ایکٹنگ اسکول شروع کرنا چاہتے ہیں۔ صحافیوں سے گفتگو کرتے ہوئے انہوں نے اپنے پرانے دنوں کو بھی یاد کیا اور شملہ سے جڑی سنہری یادیں صحافیوں کے ساتھ شیئر کیں۔ اداکار انوپم کھیر ان دنوں ہماچل پردیش کے دارالحکومت شملہ میں مقیم ہیں۔
قابل ذکر ہے کہ انوپم کھیر کے خاندان کا شملہ سے گہرا تعلق ہے۔ انوپم کھیر کا بچپن شملہ میں گزرا۔ ان کے والد آنجہانی پشکرناتھ کھیر یہاں محکمہ جنگلات میں کلرک کے طور پر کام کرتے تھے۔پورا خاندان کئی سالوں سے شملہ کے نابھہ اسٹیٹ میں واقع سرکاری کوارٹر، بلاک نمبر-4 میں رہتا تھا۔ 7 مارچ 1955 کو شملہ میں پیدا ہونے والے انوپم کھیر اپنے اسکول کالج کے دنوں میں ڈراموں میں حصہ لیا کرتے تھے۔ انوپم کھیر کو ان کے دوست بٹو کے نام سے پکارتے ہیں۔
