جموں ،8 ستمبر:
محکمہ موسمیات نے جموں و کشمیر میں بنیادی طور پر موسم خشک رہنے کی پیشن گوئی کی ہے تاہم اس کے ساتھ ہی انہوں نے آئندہ 24 گھنٹوں کے دوران جموں ڈویژن میں ایک یا دو مقامات پر ہلکی بارش یا گرج چمک کے ساتھ بارش کا امکان ظاہر کیا ہے۔ محکمہ موسمیات کے مطابق اس ہفتے کے آخر تک موسم میں کوئی خاص تبدیلی متوقع نہیں ہے۔
دوسری جانب جموں سری نگر شاہراہ پر گاڑیوں کی آمدورفت بدستور جاری ہے۔ محکمہ ٹریفک کے مطابق موسم صاف ہونے کے باعث شاہراہ پر لینڈ سلائیڈنگ کا کوئی امکان نہیں ہے۔ پھر بھی وہ صورتحال پر نظر رکھے ہوئے ہے۔ اس کے ساتھ ہی سری نگر لیہہ اور پونچھ کو وادی کشمیر سے ملانے والی مغل روڈ پر گاڑیوں کی آمدورفت بھی آسانی سے جاری ہے۔ اس دوران سری نگر میں کم سے کم درجہ حرارت 16.8 ڈگری سیلسیس، قاضی گنڈ میں 14.6، پہلگام میں 10.7 ڈگری سیلسیس ریکارڈ کیا گیا۔ کوکرناگ میں کم سے کم درجہ حرارت 13.8، دنیا کے مشہور گلمرگ ریزورٹ میں درجہ حرارت 10.5 ڈگری سیلسیس ریکارڈ کیا گیا۔ جموں میں کم از کم درجہ حرارت 25.1 ڈگری سیلسیس، بانہال میں 15.8 ، بٹوت میں .17.1، کٹرا میں 22.8 اور بھدرواہ میں 16.2 ڈگری سیلسیس ریکارڈ کیا گیا۔
محکمہ موسمیات کا کہنا ہے کہ رواں ہفتے کے آخر تک موسم کا انداز ایسا ہی رہے گا۔ شیر کشمیر زرعی یونیورسٹی کے ماہر موسمیات ڈاکٹر مہندر سنگھ نے بتایا کہ اس مانسون میں اچھی بارش ہوئی ہے، کسانوں کو کافی فائدہ ہوا ہے۔ ہندوستھان سماچار
