سری نگر،06 مئی :
سینٹرل بیورو آف انوسٹی گیشن (سی بی آئی ) نے ریجنل ٹرانسپورٹ آفس سری نگر کے دفتر پر چھاپہ ڈالا جس دوران اہم کاغذات اور قابل اعتراض مواد برآمد کرنے کا دعویٰ کیا گیا ہے۔سرکاری ذرائع نے بتایا کہ ریجنل ٹرانسپورٹ آفس سری نگر میں فراڈ ہونے کی مسلسل شکایتیں موصول ہونے کے بعد سی بی آئی کی ایک اعلیٰ سطحی ٹیم نے سری نگر میں قائم ٹرانسپورٹ آفس پر چھاپہ ڈالا
انہوں نے بتایا کہ نئی گاڑیوں اور باہری ریاستوں کی نمبر پلیٹ والی گاڑیوں کی رجسٹریشن میں بھاری پیمانے پر خرد برد کی شکایات موصول ہونے کے بعد سینٹرل بیورو آف انوسٹی گیشن کی ٹیم نے ریجنل ٹرانسپورٹ دفتر پر چھاپہ مارا ۔
ذرائع نے بتایا کہ ٹرانسپورٹ آفس میں بڑے پیمانے پر خرد برد ہوا ہے اور اس جعلسازی میں بعض آفیسران کے نا م بھی سامنے آئے ہیں ۔
معلوم ہوا ہے کہ پچھلے کئی سالوں سے ریجنل ٹرانسپورٹ آفس سری نگر میں یہ فراڈ ہو رہا تھا اور اس میں کئی بڑے بااثر آفیسران کے نام بھی سی بی آئی کے سامنے آئے ہیں۔
ذرائع کا کہنا ہے کہ چونکہ سی بی آئی نے چھاپہ ماری کے دوران اہم کاغذات ضبط کرنے کا دعویٰ کیا ہے لہذا آنے والے دنوں کے دوران مرکزی تفتیشی ایجنسی کی جانب سے گرفتاریاں بھی متوقع ہے۔
ریجنل ٹرانسپورٹ آفس کے ایک سینئر عہدیدار نے چھاپہ ماری کی تصدیق کرتے ہوئے بتایا کہ جمعے اعلیٰ الصبح سی بی آئی ٹیم نے دفتر پر چھاپہ ڈالا ہے۔
انہوں نے بتایا کہ تفتیشی ٹیم نے کچھ کاغذات بھی ضبط کئے جبکہ آفیسران نے چھاپے کے دوران سی بی آئی ٹیم کے ساتھ بھر پور تعاون فراہم کیا ۔(یو این آئی)
