سری نگر،31 مئی (یو این آئی) جنوبی ضلع کولگام کے گوپال پورہ کے ہائی اسکول میں تعینات ہندو خاتون ٹیچر کی ہلاکت کو بہیمانہ اور انسانیت سوز واقعہ قرار دیتے ہوئے مقامی لوگوں اور طلبا نے اس واقعے کی شدید مذمت کی ہے۔
ہائی اسکول میں زیر تعلیم طلبا نے نامہ نگاروں سے بات چیت کے دوران بتایا کہ منگل صبح دس بجے کے قریب رجنی میم پر نزدیک سے گولیاں چلائیں گئیں۔
انہوں نے بتایا کہ ایک گولی چلنے کی آواز سنائی دی جس کے بعد ہم اسکول کے اندر چلے گئے۔
طلبا کا کہنا تھا کہ گولی کی آواز سنتے ہی اسکول میں تعینات باقی عملہ باہر آیا اور زخمی ٹیچر کو علاج ومعالجہ کی خاطر نزدیکی ہسپتال منتقل کیا۔
انہوں نے مزید کہا کہ رجنی میم ہسٹری مضمون کی پڑھاتی تھی اور وہ پچھلے چھ برسوں سے لگن اور محنت کے ساتھ درس وتدریس کا کام انجام دیتی تھی۔
دریں اثنا مقامی لوگوں نے بھی خاتون ٹیچر کی ہلاکت کو انسانیت سوز اور بہیمانہ واقعہ قرار دیتے ہوئے کہا کہ رجنی ہمارے بچوں کو علم کے نور سے منور کرتی تھی اور اُن کے قتل کی جتنی بھی مذمت کی جائے کم ہے۔
