سری نگر،2 جون :
جموں و کشمیر کے سابق وزرائے اعلیٰ عمر عبدللہ اور محبوبہ مفتی نے کولگام میں مشتبہ جنگجو کے ہاتھوں راجستھان کے بینک منیجر کی ہلاکت کی شدید الفاظ میں مذمت کی ہے۔
انہوں نے مہلوک کے اہلخانہ کے ساتھ ہمدردی کا اظہار کرتے ہوئے ان کی خدمت میں تعزیت پیش کی ہے۔
نیشنل کانفرنس کے نائب صدر اور سابق وزیر اعلیٰ عمر عبداللہ نے اس واقعے پر اظہار افسوس کرتے ہوئے اپنے ایک ٹویٹ میں کہا: ’وجے کمار کی ٹارگیٹ کلنگ کی خبر سن کر صدمہ ہوا‘۔
انہوں نے کہا: ’ایک حملے کی مذمت اور موت پر تعزیت کرنے کے سلسلے میں ٹویٹ کرنا اب ذہن کو بے حس کرنے والا معمول بن رہا ہے‘۔
ان کا مزید کہنا تھا کہ اس طرح سے خاندانوں کو تباہ ہوتے ہوئے دیکھنے سے دل چھلنی چھلنی ہو رہا ہے‘۔
پی ڈی پی صدر اور سابق وزیر اعلیٰ محبوبہ مفتی نے اپنے ایک ٹویٹ میں کہا: ’وجے کمار، بینک منیجر جو کولگام میں کام کرتا تھا، کی آج ہونے والی ایک اور ٹارگیٹ کلنگ کی مذمت کرتی ہوں‘۔
انہوں نے مہلوک کے اہلخانہ کے ساتھ اظہار ہمدردی کیا۔
دریں اثنا پیپلز کانفرنس کے صدر سجاد غنی لون نے بھی اس واقعے کی مذمت کرتے ہوئے اپنے ایک ٹویٹ میں کہا: ’ایک بار پھر ایک انتہائی المناک خبر آ رہی ہے کہ ایک بے قصور شہری جو کولگام کے ایک بینک میں منیجر تھا، کو گولی مار کر ہلاک کر دیا گیا ہے‘۔
ان کا ٹویٹ میں کہنا تھا: ’ایسے وحشیانہ حرکات کی مذمت کرنے کے لئے میرے پاس الفاظ نہیں ہیں خدا اہلخانہ کو یہ صدمہ برادشت کرنے کا حوصلہ دے‘۔
(یو این آئی)
