سری نگر، 02 جون:
جموں وکشمیر کے وسطی ضلع بڈگام کے ماگرے پورہ چاڈورہ علاقے میں جمعرات کی شام کو مشتبہ جنگجووں نے دو غیر مقامی مزدوروں پر نزدیک سے گولیاں چلائیں جس کے نتیجے میں دونوں شدید طورپر زخمی ہوئے اور بعد میں ایک کی صد ر ہسپتال سری نگر میں موت واقع ہوئی۔
سرکاری ذرائع نے بتایا کہ جمعرات دیر شام ماگرے پورہ چاڈورہ میں مشتبہ جنگجووں نے دو غیر مقامی مزدوروں پر اندھا دھند فائرنگ کی جس کے نتیجے میں دونوں شدید طورپر زخمی ہوئے۔انہوں نے بتایا کہ آس پاس موجود لوگوں نے زخمیوں کو پبلک ہیلتھ سینٹر منتقل کیا جہاں ابتدائی مرہم پٹی کے بعد دونوں کو صدر ہسپتال سری نگر منتقل کیا گیا تاہم ایک مزدور زخموں کی تاب نہ لا کر چل بسا۔متوفی کی شناخت دلخش ساکن بہار کے بطور ہوئی ہے۔
انہوں نے بتایا کہ زخمی کی پہچان گوریا ساکن پنجاب کے بطور کی گئی۔دریں اثنا سیکورٹی فورسز نے ایک وسیع علاقے کو محاصرے میں لے کر حملہ آوروں کی بڑے پیمانے پر تلاش شروع کی گئی ہے۔
واضح رہے کہ جمعرات کی صبح کو کولگام میں بھی ایک غیر مقامی بینک منیجر ملی ٹینٹوں کے ہاتھوں مار ا گیا ابھی یہ خبر کانوں میں گونج ہی رہی تھی کہ جمعرات کی شام کو ملی ٹینٹوں نے ماگرے پورہ چاڈورہ میں دو غیر مقامی مزدوروں پر فائرنگ کی۔وادی کشمیر میں ٹارگیٹ کلنگ کے پے درپے واقعات رونما ہونے کے بعد پوری وادی میں ریڈ الرٹ جاری کیا گیا ہے۔یواین آئی
