سری نگر، 7جون:
جنوبی کشمیر کے ضلع شوپیاں کے بادی مرگ علاقے میں سیکورٹی فورسز اور جنگجووں کے مابین تصادم آرائی میں ایک مقامی جنگجو مارا گیا جبکہ علاقے میں آپریشن ہنوز جاری ہے۔ایک پولیس ترجمان نے اپنے ایک ٹویٹ میں کہا کہ شوپیاں انکاونٹر میں ایک جنگجو مارا گیا۔
آئی جی کشمیر وجے کمار نے تفصیلات فراہم کرتے ہوئے بتایا کہ منگل کے روز سیکورٹی فورسز نے مصدقہ اطلاع موصول ہونے کے بعد شوپیاں کے بادی مرگ علاقے کو محاصرے میں لے کر جنگجو مخالف آپریشن شروع کیا۔
انہوں نے بتایا کہ جونہی سیکورٹی فورسز کے اہلکاروں نے مشتبہ مقام کی اورپیش قدمی شروع کی تو وہاں پر موجود جنگجووں نے حفاظتی عملے پر اندھا دھند فائرنگ شروع کی۔ان کے مطابق سیکورٹی فورسز نے بھی پوزیشن سنبھال کر جوابی کارروائی کا آغاز کیا جس دوران دو طرفہ گولیوں کا تبادلہ شروع ہوا۔
انہوں نے بتایا کہ گولیوں کا تبادلہ تھم جانے کے بعد تصادم کی جگہ ایک ملی ٹینٹ کی لاش برآمد کی گئی جس کی بعد میں شناخت ندیم احمد راتھر عرف کامران ساکن کولگام کے بطور ہوئی ہے۔ آئی جی نے بتایا کہ مہلوک جنگجو حزب سے وابستہ اور وہ عام شہریوں کو تشدد کا نشانہ بنانے کی کارروائیوں میں ملوث تھا۔ انہوں نے بتایا کہ مذکورہ ملی ٹینٹ مقامی نوجوانوں کو جنگجو صفوں میں شمولیت اختیار کرنے میں بھی پیش پیش رہتا تھا۔
