نئی دہلی، 15 جولائی:
ملک میں آج (جمعہ) سے 18 سال سے 59 سال کی عمر کے افراد کو مفت بوسٹر ڈوز ملے گی۔ اگلے 75 دنوں تک تمام لوگوں کی ویکسینیشن کے لیے مہم چلائی جا رہی ہے۔ بالغ افراد تمام سرکاری حفاظتی ٹیکوں کے مراکز میں جا کر حفاظتی ویکسین حاصل کر سکیں گے۔ یہ بات قابل ذکر ہے کہ 60 سال سے زیادہ عمر کے لوگوں کو پہلے ہی مفت بوسٹر ڈوز لگائی جارہی ہے۔
قبل ازیں جمعرات کو مرکزی صحت سکریٹری راجیش بھوشن نے تمام ریاستوں کے سکریٹریوں کے ساتھ اس مہم کے آغاز کی تیاریوں کا جائزہ لیا۔ اس میٹنگ میں تمام ریاستوں اور مرکز کے زیر انتظام صوبوں پر زور دیا گیا کہ وہ کورونا کے خلاف اس جنگ میں زیادہ سے زیادہ لوگوں کو بوسٹر ڈوز دیں۔ کم ٹیکہ لگانے والی ریاستوں کو بھی مشورہ دیا گیا ہے کہ وہ مذہبی مقامات پر خصوصی کیمپ منعقد کریں اور بوسٹر ڈوز دینے کا انتظام کریں۔ اس مہم کے تحت مرکزی وزیر بھوپیندر یادو جمعہ کو وزارت محنت میں ایک خصوصی کیمپ شروع کرنے جا رہے ہیں۔
75 دن تک جاری رہے گی مہم : یہ سہولت 18 سے 59 سال کی عمر کے لوگوں کے لیے سرکاری مراکز پر دستیاب کرائی گئی ہے۔ ملک میں کورونا انفیکشن کو روکنے کے لیے بوسٹر ڈوز میں تیزی لانے کے مقصد سے مرکزی حکومت نے آزادی کے امرت مہوتسو کے طور پر 75 دنوں تک چلانے کا فیصلہ کیا ہے۔
