جموں،22جولائی:
جموں و کشمیر نیشنل کانفرنس کے صدر اور رکن پارلیمان ڈاکٹر فاروق عبداللہ نے CSIR-IIIM کے سابق سینئر پرنسپل اور ممتاز سائنسدان ڈاکٹر گرودرشن سنگھ کو جموں میں پارٹی میں خوش آمدید کہا۔ڈاکٹر سنگھ کا پارٹی میں خیرمقدم کرتے ہوئے ڈاکٹر فاروق نے کہا کہ پارٹی تحقیق اور علمی صلاحیتوں میں ان کے تجربے سے فائدہ اٹھائے گی۔ انہوں نے کہا کہ نیشنل کانفرنس کے دروازے عوام دوست، عوام مقبول اور باصلاحیت لوگوں کیلئے ہمیشہ کھلے ہیں اور پارٹی نے ہمیشہ ایسے افراد کا خیر مقدم کرکے عوام کیلئے کام کرنے کا موقعہ فراہم کیا ہے جن میں حقیقی معنوں میں عوامی خدمت کا جذبہ ہوتا ہے۔ ا
نہوں نے کہا کہ نیشنل کانفرنس نے ہمیشہ مساوات اور برابری میں یقین رکھا ہے اور آج بھی جماعت اسی اصول پر قائم و دائم ہے۔ انہوں نے کہا کہ نیشنل کانفرنس اس وقت جموںوکشمیر کے عوام کے حقوق کی بحالی کی جدوجہد میں مصروف ہے اور یہ لڑائی کسی ایک فرد یا جماعت کی نہیں بلکہ تینوں خطوں سے تعلق رکھنے والے ہر ایک طبقے ،ہر ایک فرد اور ہر ایک جماعت کی لڑائی ہے۔ جموںوکشمیر کے عوام کے حقوق کی بحالی ہماری منزل مقصود ہے لیکن ہمیں لوگوں کے روز مرہ کے مسائل و مشکلات اور چیلنجوں کو نظرانداز نہیں کرنا ہے بلکہ انہیں ہر سطح اور زور دار طریقے سے اُجاگر کرکے ان کا سدباب کرانے کی ہر ممکن کوشش کرنی ہے۔ اس موقع پر ڈاکٹر سنگھ نے پارٹی میں شمولیت پر اطمینان کا اظہار کرتے ہوئے پارٹی کو مضبوط کرنے کا عزم کیا۔
یہ بات قابل ذکر ہے کہ ڈاکٹر سنگھ ایک سماجی کارکن بھی ہیں اور CSIR –IIIM جموں (ICMR نئی دہلی سے منظور شدہ لیب) کی Covid-19 ٹیسٹنگ لیب کے مجموعی طور پر انچارج بھی تھے۔اس موقع پر صدرِ صوبہ جموں ایڈوکیٹ رتن لال گپتا ، صوبائی سکریٹری شیخ بشیر احمد، زون صدر چناب ویلیسجاد احمد کچلو ، صوبائی صدر ایس سی سیل وجے لوچن ، صوبائی صدر او بی سی سیل عبدالغنی تیلی اور دیگر لیڈران بھی موجود تھے۔
