سرینگر،27 جولائی:
جموں و کشمیر میں رواں ماہ تقریباً ہر روز بارش ہوتی رہتی ہے۔ مسلسل بارش کی وجہ سے نشیبی علاقوں کے کسانوں کی پریشانی بھی بڑھ رہی ہے۔ محکمہ موسمیات سے موصولہ اطلاعات کے مطابق اس ہفتے ایلو الرٹ جاری ہے۔ اس دوران وقفے وقفے سے بارش ہوگی۔ اور پورا ہفتے مطلع ابر آلود رہے گا۔
دریں اثنا، ڈی سی رامبن نے اپنے آفیشل ٹویٹر ہینڈل پر شالگڈی علاقے پوگل علاقے میں شدید بارش کی وجہ سے آئے سیلاب کی ویڈیو شیئر کی اور بتایا کہ پوگل کے علاقے شالگڈی میں صبح ہونے والی شدید بارش سے سیلاب جیسی صورتحال پیدا ہو گئی ہے۔سیلاب کی وجہ سے کسی بھی جانی و مالی نقصان کی کوئی اطلاع نہیں ہے۔ فی الحال پوگل-مالیگام سڑک کو بند کردیا گیا ہے۔ رواں ہفتے ہونے والی بارشوں کے بعد دریائے چناب، توی اور دیگر آبی ذرائع کے پانی میں اضافہ ہوگیا ہے۔
گزشتہ پانچ دنوں سے وقفے وقفے سے بارش ہو رہی ہے۔کہی جگہوں پر موسلادھار بارشیں ہو رہی ہیں۔ موسمیات کے مطابق گزشتہ 24 گھنٹوں کے دوران جموں میں 46.5 ملی میٹر، بانہال میں 11.7، بٹوت میں 29.0 ملی میٹر، کٹرہ میں 2.2 ملی میٹر، بھدرواہ میں 16.8 ملی میٹر بارش ریکارڈ کی گئی۔ جبکہ سری نگر میں 1.3 ملی میٹر بارش ریکارڈ کی گئی۔
اس دوران جموں میں زیادہ سے زیادہ درجہ حرارت 33.0 ڈگری سیلسیس ،اور کم سے کم درجہ حرارت 25.8 ڈگری سیلسیس رہا۔ جموں ڈویژن کے دیگر شہروں میں درجہ حرارت اس سے کم رہا۔ سری نگر کا زیادہ سے زیادہ درجہ حرارت 31.2، کم سے کم درجہ حرارت 21.8 ڈگری سیلسیس ریکارڈ کیا گیا۔