جموں 28 جولائی :
جموں پونچھ شاہراہ پر شدید بارشوں کے باعث لینڈ سلائڈنگ کی وجہ سے کچھ دیر کے لیے بند رہنے کے بعد ایک بار پھر ٹریفک بحال ہو گئی ہے۔ دریں اثنا، پونچھ ضلع میں کئی دیگر سڑکوں کی بحالی کا کام جاری ہے۔ڈپٹی ایس پی ٹریفک پونچھ-راجوری آفتاب بخاری نے بتایا کہ کلائی پوائنٹ پر آج صبح لینڈ سلائیڈنگ کے بعد جموں پونچھ ہائی وے پر ٹریفک معطل ہوگئی۔
ان کا کہنا تھا کہ اس کے بعد مزدور اور مشینری راستے کو صاف کرنے میں مصروف ہو گئے اور جیسے ہی راستہ صاف ہوا ٹریفک بحال کر دی گئی۔انہوں نے کہا کہ ضلع میں شدید بارشوں سے متاثرہ دیگر سڑکوں پر بھی ٹریفک بحال کی جا رہی ہے۔
دریں اثناء راجوری پونچھ اضلاع کو کشمیر کے شوپیاں سے ملانے والی مغل روڈ پر بھی ٹریفک بحال کر دی گئی ہے۔ ضلع انتظامیہ پونچھ نے لوگوں کو گھروں میں رہنے کا مشورہ دیا ہے۔دریں اثناء، مقامی اسکول ایجوکیشن ڈیپارٹمنٹ نے جمعرات کو اسکولوں کو ایک دن کے لیے بند رکھنے کی ہدایت کی ہے۔ تاہم اساتذہ کو اداروں میں موجود رہنے کو کہا گیا ہے۔
