سرینگر، 20 ستمبر:
آئی اے ایس آفیسر شاہ فیصل نے سپریم کورٹ سے اپنی درخواست واپس لے لی ہے ،جس میں جموں و کشمیر کو خصوصی درجہ دینے والے آرٹیکل 370 کو ختم کرنے کے صدارتی حکم کو چیلنج کیا گیا تھا۔ فیصل ان 23 درخواست گزاروں میں شامل تھے جنہوں نے آرٹیکل 370 کی دفعات کو منسوخ کرنے کے مرکز کے فیصلے کو چیلنج کیا تھا۔
شاہ فیصل کا پٹیشن واپس لینے کا فیصلہ اس سال اپریل میں انڈین ایڈمنسٹریٹو سروس میں واپس لیے جانے اور وزارت ثقافت میں ڈپٹی سیکرٹری مقرر کیے جانے کے چند ماہ بعد آیا ہے۔ فیصل نے 2019 میں جموں و کشمیر میں اپنی سیاسی جماعت قائم کرنے کے لیے احتجاجاً ملازمت سے استعفیٰ دے دیا تھا۔ تاہم ان کا استعفیٰ حکومت نے کبھی قبول نہیں کیا تھا اور بعد میں انہوں نے اسے واپس لے لیا تھا۔
