سر ینگر:12ستمبر:
سرینگر پولیس نے اسدالدین اویسی کے بیان پرردعمل ظاہر کرتے ہوئے یہ واضح کیاہے کہ سری نگرجامع مسجد مکمل طور پر کھلی ہوئی ہے۔
اطلاعات کے مطابق AIMIM کے سربراہ اسد الدین اویسی کے جامع مسجدسری نگر بند ہونے کے ریمارکس کا جواب دیتے ہوئے سرینگر پولیس نے ایک ٹویٹ میں کہا کہ مذکورہ جامع مسجد مکمل طور پر کھلی ہوئی ہے، اسد الدین اویسی اس سچائی سے دُور ہیں۔
پولیس نے کہا کہ جامع مسجد کو مکمل طور پر کھول دیا گیا ہے۔ کووڈ19 کے بعد صرف 3 مواقع پر اسے ملی ٹنٹ حملے اور امن و امان کی صورتحال کی وجہ سے جمعہ کی نماز کےلئے عارضی طور پر بند کیا گیا تھا۔پولیس نے کہاکہ یہ اس وقت ہوا جب جامع مسجد کے ذمہ داروں یعنی منتظمین نے جامع مسجدکے اندر ہونے والے واقعات کی ذمہ داری قبول کرنے میں ناکام رہے۔
قابل ذکر ہے کہ اسد الدین اویسی نے ٹویٹ کرکے جموں و کشمیر کے لیفٹیننٹ گورنر منوج سنہا سے پوچھا تھا کہ جب شوپیاں اور پلوامہ میں سنیما ہال کھولے گئے ہیں تو سرینگر کی جامع مسجد ہر جمعہ کو کیوں بند کردی جاتی ہے۔ اسدالدین اویسی نے ٹویٹ کیا تھا کہ منوج سنہا سر، آپ نے شوپیاں اور پلوامہ میں سنیما ہال تو کھول دیئے ہیں لیکن سرینگر کی جامع مسجد ہر جمعہ کو کیوں بند رہتی ہے، کم از کم دوپہر کے میٹنی شو کے دوران اسے بند نہ کریں۔
