سرینگر24 فروری:
جنوبی ضلع اننت ناگ کے حسن پورہ بجبہاڑہ علاقے میں نامعلوم بندوق برداروں نے مقامی شہری پر فائرنگ کی جس کے نتیجے میں وہ زخمی ہوا ہے۔ پولیس ذرائع نے اسکی تصدیق کرتے ہوئے بتایا کہ آس پاس علاقوں کو محاصرے میں لے کر حملہ آوروں کی تلاش شروع کی گئی ۔
جمعے کی شام کو حسن پورہ آرونی بجبہاڑہ میں اُس وقت سنسنی کا ماحول پھیل گیا جب نامعلوم بندوق برداروں نے ایک عام شہری پر فائرنگ کی جس کے نتیجے میں وہ خون میں لت پت ہوا۔ معلوم ہوا ہے کہ زخمی نوجوان جس کی شناخت آصف علی گنائی ساکن حسن پورہ کے بطور ہوئی ہے۔ نمائندے نے بتایا کہ حملے کی اطلاع ملتے ہی سیکورٹی فورسز نے آس پاس علاقوں کو محاصرے میں لے کر تلاشی آپریشن شروع کیا ۔ ذرائع نے بتایا کہ زخمی شہری کچھ روز قبل ہی گھر واپس لوٹ آیا تھا ۔
دریں اثنا پولیس کی جانب سے جاری کئے گئے ایک بیان میں کہا گیا ہے کہ ملی ٹینٹوں نے حسن پورہ میں مسجد شریف کے باہر عام شہری آصف گنائی پر فائرنگ کی جس کے نتیجے میں وہ شدید طورپر زخمی ہوا ہے۔ انہوں نے بتایا کہ آس پاس علاقوں کو محاصرے میں لے کر تلاشی آپریشن شروع کیا گیا ۔
