پونے، 15 اپریل :
مہاراشٹر کے رائے گڑھ ضلع میں ہفتہ کی صبح ایک بس کھائی میں گرنے سے 12 افراد ہلاک اور متعدد زخمی ہو گئے، جن میں سے 25 کی حالت نازک ہے۔
رائے گڑھ ضلع کے پولیس سپرنٹنڈنٹ سومناتھ گھارگے نے بتایا کہ یہ واقعہ ممبئی پونے ہائی وے پر بورگھاٹ میں شنگروبا مندر کے قریب اس وقت پیش آیا جب ایک نجی بس جس میں تقریباً 45 مسافر سوار تھے گہری کھائی میں گر گئی۔ انہوں نے کہا کہ راحت اور بچاؤ کا کام جاری ہے۔ زخمیوں کا کھوپولی کے دیہی اسپتالوں میں علاج جاری ہے۔
انہوں نے کہا کہ ہائیکرز گروپ، آئی آر بی کی ٹیمیں متاثرین کو امدادی کام فراہم کر رہی ہیں اور نجی اسپتالوں کے ڈاکٹروں کو مدد کے لیے بلایا گیا ہے۔ انہوں نے بتایا کہ بس میں سوار مسافر پونے میں ایک پروگرام میں شرکت کے بعد گورے گاؤں ممبئی واپس آرہے تھے۔ پولیس کا کہنا ہے کہ اب بھی کئی مسافروں کے کھائی میں پھنسے ہونے کا خدشہ ہے اور امدادی کارروائیاں جاری ہیں۔ انہوں نے کہا کہ حادثے کی اصل وجہ کا ابھی تک پتہ نہیں چل سکا ہے، لیکن ابتدائی معلومات کے مطابق ڈرائیور گاڑی پر سے کنٹرول کھو بیٹھا، جس سے 12 سے زائد مسافر ہلاک اور متعدد زخمی ہوگئے۔
