کشتواڑ: مرکز کے زیر انتظام خطہ جموں و کشمیر کے ضلع کشتواڑ میں آج صبح ایک المناک واقعہ پیش آیا۔ کشتواڑ ضلع کے کیشوان علاقے میں ایک خانہ بدوش کنبہ کے چار افراد کی موت ہوگئی۔ پولیس کے بیان کے مطابق گذشتہ شب ہوئی تیز بارش اور طوفانی ہواؤں کی وجہ سے کشتواڑ شہر سے 50 کلومیٹر دور کیشوان کے جنگلاتی علاقے کے بھلنا علاقے میں ایک درخت خانہ بدوش کے خیمہ پر گر گیا، جس کے سبب ایک ہی کنبہ کے چار افراد کی موت ہوگئی۔ بتایا جارہا ہے کہ متاثرہ کنبہ اپنی بھیڑ بکریوں کے ساتھ دچن کی طرف گامزن تھا، تاہم علاقہ میں تیز بارش اور ہواؤں کی وجہ سے وہ مذکورہ علاقہ میں ہی خیمہ زن ہوگیا، جہاں گذشتہ شب ان کے خیمہ پر درخت گرنے کے سبب ان کے کنبہ کے چار افراد کی موت ہوگئی۔
ڈی سی کشتواڑ ڈاکٹر دیونش یادو نے بتایا کہ اس افسوس ناک واقعہ میں 3 خواتین سمیت 4 افراد موقعے پر ہی ہلاک ہو گئے۔ پولیس پارٹی موقعے پر پہنچی اور ریسکیو آپریشن شروع کر دیا۔ ڈی سی نے کہا کہ لاشوں کو قانونی کارروائی کے لیے ہسپتال لے جایا جا رہا ہے۔ ڈی سی نے کہا کہ ریڈ کراس سوسائٹی کی طرف سے مرنے والے افراد کے لواحقین کو 50,000 روپے کی فوری امداد دی جائے گی۔ مرنے والوں کی شناخت نذیر احمد ولد چٹو، ان کی اہلیہ نثارہ بیگم، میمو نہ بیگم ولد محمد شریف اور شمع بیگم ولد کالو تمام کٹھوعہ ضلع کے گٹھی بروال کے طور پر کی گئی ہے۔
