سرینگر : بھارتیہ فوج کے سربراہ جنرل منوج پانڈے نے جمعہ کے روز جموں و کشمیر کے لیفٹیننٹ گورنر منوج سنہا سے ملاقات کی۔ انتظامیہ کی جانب سے جاری کردہ بیان میں کہا گیا ہے کہ سرینگر کے راج بھون میں بھارتیہ فوج کے سربراہ اور لیفٹیننٹ گورنر منوج سنہا کے درمیان مختلف سیکیورٹی مسائل پر تفصیلی تبادلہ خیال کیا گیا۔
انتظامیہ کی جانب سے جاری کردہ بیان میں مزید کہا گیا تھا کہ فوج کے سربراہ کے ہمراہ جی او سی شمالی کمان جنرل اپیندر دویدی، اور جی او سی 15 کور لیفٹیننٹ جنرل راجیو گھئی بھی موجود تھے۔ واضح رہے کہ اس وقت وادی کشمیر میں سالانہ امرناتھ یاترا جاری ہے اور اس کے پیش نظر حفاظتی اقدامات سخت کیے گئے ہیں، نیشنل ہائی وے سمیت جگہ جگہ سی آر پی ایف کے اہلکاروں کو تعینات کیا گیا ہے۔
سکیورٹی کے سخت انتظامات کے باوجود جمعرات کی شام نا معلوم عسکریت پسند جنوبی کشمیر کے شوپیاں ضلع میں تین غیر مقامی مزدوروں کو اپنی گولیوں کا نشانہ بنانے میں کامیاب ہوئے ہیں۔ اگرچہ تینوں مزدور اس وقت ہسپتال میں زیر علاج ہیں وہیں سیکیورٹی فورسز نے حفاظتی اقدامات میں مزید اضافہ کیا ہے اور جلد ہی وادی میں سی آر پی ایف کے کوبرا کمانڈوز کو تعینات کیا جا رہا ہے۔
