احمد آباد۔ 9؍ جنوری:
متحدہ عرب امارات کے صدر محمد بن زائید النہیان وائبرینٹ گجرات گلوبل سمٹ میں شرکت کے لیے منگل کی شام گجرات کے احمد آباد پہنچے۔ ہوائی اڈے پر وزیر اعظم نریندر مودی نے ان کا استقبال کیا اور دونوں رہنماؤں نے شہر میں روڈ شو کیا۔
گجرات کے وزیر اعلی بھوپیندر بھائی پٹیل، وزیر خارجہ ایس جے شنکر، قومی سلامتی کے مشیر اجیت ڈوول، خارجہ سکریٹری ونے موہن کواترا اور دیگر حکام متحدہ عرب امارات کے صدر کے استقبال کے لیے ہوائی اڈے پر موجود تھے۔ متحدہ عرب امارات کے صدر کو ان کی آمد پر رسمی گارڈ آف آنر دیا گیا۔متحدہ عرب امارات کے صدر کے علاوہ تیمور لیسٹ کے صدر جوز راموس ہورٹا سمیت دیگر عالمی رہنما وائبرنٹ گجرات سمٹ میں شرکت کر رہے ہیں۔
پی ایم مودی گجرات کے مہاتما مندر میں وائبرنٹ گجرات گلوبل سمٹ 2024 کے 10ویں ایڈیشن کا افتتاح کرنے کے لیے دو روزہ دورے پر پیر کو احمد آباد پہنچے۔گجرات پہنچنے پر، پی ایم مودی نے ایکس پر شیئر کی گئی ایک پوسٹ میں کہا، "کچھ دیر پہلے احمد آباد پہنچے۔ اگلے دو دنوں میں، وائبرنٹ گجرات سمٹ اور متعلقہ پروگراموں میں حصہ لیں گے۔ یہ بہت خوشی کی بات ہے۔ اس سمٹ کے دوران مختلف عالمی رہنما ہمارے ساتھ شامل ہوں گے۔میرے بھائی محمد بن زاید کی آمد بہت خاص ہے۔میری وائبرینٹ گجرات سمٹ کے ساتھ بہت گہرا تعلق ہے اور مجھے یہ دیکھ کر خوشی ہوئی کہ اس پلیٹ فارم نے گجرات کی ترقی میں کیا کردار ادا کیا ہے۔ ترقی اور کئی لوگوں کے لیے مواقع پیدا کیے ہیں۔” وائبرینٹ گجرات گلوبل سمٹ کا آغاز 2003 میں مودی کی قیادت میں ہوا تھا جب وہ ریاست کے وزیر اعلیٰ تھے۔
وائبرنٹ گجرات گلوبل سمٹ کا دسواں ایڈیشن گاندھی نگر میں 10 سے 12 جنوری تک منعقد ہو رہا ہے۔اس سال کے سمٹ کے لیے 34 پارٹنر ممالک اور 16 پارٹنر تنظیمیں ہیں۔ مزید یہ کہ شمال مشرقی خطے کی ترقی کی وزارت شمال مشرقی علاقوں میں سرمایہ کاری کے مواقع کو ظاہر کرنے کے لیے وائبرنٹ گجرات پلیٹ فارم کا استعمال کرے گی۔ یہ سمٹ عالمی سطح پر متعلقہ موضوعات جیسے صنعت 4.0، ٹیکنالوجی اور اختراع، پائیدار مینوفیکچرنگ، گرین ہائیڈروجن، الیکٹرک موبلٹی اور قابل تجدید توانائی اور پائیداری کی طرف منتقلی جیسے سیمینارز اور کانفرنسوں کی میزبانی کرے گا۔
