رام بن: امرناتھ یاترا شردھالوؤں کو لے جا رہی ایک مسافر بردار بس ضلع رام بن میں حادثہ کا شکار ہو گئی، حادثہ میں کسی جانی نقصان کی کوئی اطلاع نہیں ہے جبکہ بعض یاتریوں کو معمولی چوٹیں آئی ہیں۔ معلومات کے مطابق سرینگر جموں قومی شاہراہ پر ضلع رام کے نچیلانہ علاقے کے قریب امرناتھ یاتریوں سے بھری بس کے حادثے کا شکار ہونے سے بعض یاتری معمولی زخمی ہو گئے۔ حکام نے بتایا کہ پنجاب سے آنے والی بس، زیر رجسٹریشن نمبر PB-02BNLM/9389 کی بریک فیل ہونے کی وجہ سے حادثہ رونما ہوا۔
حکام نے بتایا کہ واقعے میں یاتریوں کو معمولی چوٹیں آئیں اور انہیں ایک قریبی فوجی کیمپ میں ابتدائی طبی امداد دی گئی، حکام نے بتایا کہ تمام مسافر محفوظ ہیں۔ بتایا جا رہا ہے کہ امرناتھ یاتریوں کو کشمیر لے جا رہی یہ بس رجسٹرڈ نہیں تھی۔ بس شری امرناتھ یاترا سے واپس ہوشیار پور، پنجاب جا رہی تھی۔ پولیس اور دیگر اہلکار موقع پر موجود ہیں اور انہوں نے واقعہ کا نوٹس لے لیا ہے۔
یاد رہے کہ امرناتھ یاترا کے لیے حکومت کی جانب سے کڑے انتظامات کیے جاتے ہیں۔ یاترا شروع ہونے سے قریب دو ماہ قبل ہی رجسٹریشن کا عمل شروع کیا جاتا ہے اور یاتریوں سے حکومت کی جانب سے وضع کیے گئے پلان کئے مطابق ہی امرناتھ یاترا پر جانے کی تلقین کی جاتی ہے۔ تاہم اس کے باوجود بعض شردھالو حکومتی انتظامات کے بجائے از خود یاترا پر نکل جاتے ہیں۔ یاتریوں کے لیے جموں کے بھگوتی نگر بیس کیمپ سے کشمیر تک لے جانے کے لئے بسوں کے قافلہ کا خصوصی انتظام کیا جاتا ہے اور یاتریوں کی سیکورٹی کے لیے سرینگر جموں شاہراہ کے چپے چپے پر پولیس اور نیم فوجی دستے تعینات رہتے ہیں۔
