سری نگر/چیف سیکرٹری اَتل ڈولو نے سول اِنتظامیہ اور محکمہ پولیس کے سینئراَفسروں کے ساتھ ایک میٹنگ منعقد کی تاکہ یوم آزادی کی تقریبات کے سلسلے میں کئے جانے والے اِنتظامات کا جائزہ لیا جاسکے۔
میٹنگ میں ڈی جی پولیس اوراِنتظامی سیکرٹریوں کے علاوہ صوبائی کمشنروں، ایس ایس پیز ، ڈائریکٹر اِنفارمیشن ،ڈائریکٹر سکول ایجوکیشن کشمیر اور جموں، ڈائریکٹر ہیلتھ کشمیر اور جموں اور دیگر سیکورٹی ایجنسیوں کے نمائندوں نے بھی شرکت کی۔
چیف سیکرٹری نے متعلقہ اَفراد سے سری نگر اور جموں کے علاوہ ہر ضلع میں مقامات کے اِنتخاب کے بارے میں جائزہ لیا۔اُنہوں نے سری نگر اور جموں میں منعقد ہونے والے اہم تقاریب میں حصہ لینے والے دستوں کا نوٹس لیتے ہوئے ان مقامات پر حصہ لینے والے ایسے دَستوں کی نوعیت اور تعداد کے بارے میں دریافت کیا۔
اَتل ڈولونے اِس موقعہ پر پیش کی جانے والی ثقافتی پرفارمنس کے بارے میں بھی پوچھا۔ اُنہوں نے متعلقہ صوبائی کمیٹیوں کی طرف سے اعلیٰ ثقافتی پروگراموں کا اِنتخاب کرنے اور ان کی حوصلہ اَفزائی کے لئے طلباء کو ترجیح دینے پر زور دیا۔
اُنہوں نے اِس بات پر زور دیا کہ ایونٹس پہلے سے طے شدہ شیڈول اور وقت کے مطابق اِختتام پذیر ہوں۔ اُنہوں نے سڑکوں پر ٹریفک کے محتاط اِنتظام پر بھی زور دیا۔
چیف سیکرٹری نے متعلقہ صوبائی اور ضلعی اِنتظامیہ کو خراب موسمی صورتحال سے نمٹنے کے لئے مناسب اَقدامات کرنے کے لئے بھی آگاہ کیا۔ اُنہوں نے اُن پر زور دیا کہ وہ بالخصوص طلبأکے شرکأکے لئے حفاظتی اَقدامات کریں۔
اُنہوں نے اِس موقعہ پر متعلقہ حکام پر زور دیا کہ وہ صفائی ستھرائی، بجلی کی فراہمی اور تمام مقامات پر پینے کے پانی کی سہولیات کی دستیابی کے لئے اَقدامات کریں۔
اَتل ڈولونے پی آر آئی کے سابق ممبران، خواتین سیلف ہیلپ گروپوں کے ممبران اور دیگر ممتاز شہریوں کو تقریبات میں مدعو کرنے کے لئے کہا۔ اُنہوں نے مہمانوں کی سہولیت کے لئے اُنہیں وقت سے پہلے دعوت نامے بھیجنے کی بھی ہدایت دی۔
اُنہوں نے متعلقہ صوبائی اور ضلعی اَفسران کو ہدایت دی کہ وہ اَپنے متعلقہ دائرہ اِختیار میں اِنتظامات کا جائزہ لیں تاکہ اس بات کو یقینی بنایا جاسکے کہ پنچایتی سطح تک کی تقریبات اس ملک گیر کارنیوال کے مطابق منعقد ہوں۔
چیف سیکرٹری نے محکمہ اِطلاعات پر بھی زور دیا کہ وہ پبلک ایڈریس سسٹم (پی اے ایس) کی فعالیت کو پہلے سے چیک کریں۔ اُنہوں نے ان سے کہا کہ وہ مناسب بیک اَپ بھی دستیاب رکھیں۔
مزید برآں ،چیف سیکرٹری نے تمام سربراہان،صوبائی سربراہان اورضلع ترقیاتی کمشنروں پر زور دیا کہ وہ اس تقریب کے لئے بڑے عوامی بنیادی ڈھانچوں بشمول اپنے دفاتر، بڑے پُلوں اور دیگر نمایاں جگہوں کو چراغاںکریں۔
اِس موقعہ پر یہ بات سامنے آئی کہ سری نگر اور جموں میں ہونے والے دو اہم تقاریب میں 6 طلباء دستوں اور ایک خاتون دستے سمیت مجموعی طور پر 21 دستے حصہ لیں گے۔
اِس کے علاوہ متعلقہ اَفرادنے صفائی ستھرائی، طبی، پانی اور بجلی کے انتظامات کے حوالے سے کی جانے والی تیاریوں کی تفصیلات بھی پیش کیں۔ میٹنگ میںبتایا گیاکہ کئے جانے والے اِنتظامات مناسب ہوں گے۔
اس بات کا انکشاف ہوا ہے کہ ریہرسل اور فل ڈریس ریہرسل کا عمل 29 ؍جولائی سے شروع کیا جاتا ہے تاکہ اس سال 15 ؍اگست کو منائے جانے والے 77ویں یوم آزادی میں پرفارم کرنے والے شرکأکو مناسب وقت فراہم کیا جا سکے۔
