سری نگر (جموں و کشمیر): آج بھارت کرگل جنگ کی 25ویں سالگرہ منا رہا ہے اس موقعے پر وزیر اعظم نریندر مودی نے لداخ میں کرگل جنگی ہیروز کو خراج عقیدت پیش کیا۔ واضع رہے کہ آج سے پچیس سال پہلے کرگل کی جنگ لڑی گئی تھی جس میں ملک کے جوانوں نے اپنی جانوں کا نذرانہ پیش کیا تھا۔
پی ایم مودی صبح تقریباً 9:20 بجے کرگل میں اترے اور سیدھے دراس میں کرگل وار میموریل کی طرف روانہ ہوئے جہاں انہوں نے جنگی ہیروز کو خراج عقیدت پیش کیا جنہوں نے ڈیوٹی کے دوران اپنی جانوں کا نذرانہ پیش کیا تھا۔ وزیراعظم کے دورہ کو دیکھتے ہوئے یہاں پر سیکیورٹی کے انتہائی سخت انتظامات کیے گئے ہیں۔
وزیر اعظم نے جمعرات کو جنگی ہیروز کو ملک کا خراج عقیدت پیش کرنے کے لیے کرگل کے اپنے دورے کے بارے میں اپ ڈیٹ بھی کیا تھا۔ ایکس پر پی ایم مودی نے لکھا، “کل، 26 جولائی، ہر ہندوستانیوں کے لئے بہت خاص دن ہے۔ ہم جمعہ کو 25ویں کرگل وجے دیوس کو منائیں گے۔
یہ دن ان تمام لوگوں کو خراج عقیدت پیش کرنے کا دن ہے جو ہمارے ملک اور ہماری قوم کی حفاظت کرتے ہیں۔ میں کرگل وار میموریل کا دورہ کروں گا اور اپنے بہادر ہیروز کو خراج عقیدت پیش کروں گا۔ شنکن لا ٹنل پراجیکٹ کے لیے بھی کام شروع کیا جائے گا۔
کرگل جنگ کے ہیروز کو خراج تحسین پیش کرنے کے بعد، پی ایم مودی شنکن لا ٹنل پروجیکٹ کو عملی طور پر شروع کرنے والے ہیں۔ ایک سرکاری بیان کے مطابق، اس پروجیکٹ میں 4.1 کلومیٹر لمبی ٹوئن ٹیوب سرنگ شامل ہے، جو نیمو۔پدم۔درچہ روڈ پر تقریباً 15,800 فٹ کی بلندی پر تعمیر کی جائے گی۔ یہ دینا کی سب سے اونچی سرنگ ہوگی۔ یہ سرنگ لداخ میں معاشی اور سماجی ترقی کو فروغ دیتے ہوئے مسلح افواج اور آلات کی تیز رفتار اور موثر نقل و حرکت میں سہولت فراہم کرے گی۔
