سری نگر:جموں وکشمیر نیشنل کانفرنس کے صدر ڈاکٹر فاروق عبداللہ کا کہنا ہے کہ مرکزی حکومت کو جلدازجلد ریاست کا درجہ بحال کرنا چاہئے۔
انہوں نے کہاکہ اب سپریم کورٹ نے بھی سٹیٹ ہڈ کی بحالی پر دائر عرضی کو شنوائی کے لئے مقرر کیا ہے۔
ان باتوں کا اظہار موصوف نے جمعرات کی شام سری نگر میں نامہ نگاروں سے بات چیت کے دوران کیا۔
انہوں نے کہاکہ جموں وکشمیر نیشنل کانفرنس نے الیکشن منشور میں جتنے بھی وعدئے لوگوں سے کئے انہیں ہر حال میں پورا کیا جائے گا۔
فاروق عبداللہ نے کہاکہ بے روزگاری کو ختم کرنے کی خاطر موجودہ سرکار کام کرئے گی۔
سٹیٹ ہڈ کی بحالی کے بارے میں پوچھے گئے سوال کے جواب میں فاروق عبداللہ نے کہاکہ مجھے امید ہے کہ مرکزی سرکار اس حوالے سے جلدازجلد فیصلہ لے گی۔
انہوں نے کہاکہ چونکہ اب سپریم کورٹ میں بھی سٹیٹ ہڈ کی بحالی کو لے کر عرضی داخل کی گئی اس کو شنوائی کے لئے مقرر بھی کیا گیاہے۔
نیشنل کانفرنس کے صدر نے کہاکہ میری دعا ہے کہ جموں وکشمیر ترقی کرئے اور امن و امان کی فضا برقرار رہے ۔
فاروق عبداللہ سے جب راجیہ سبھا ممبر بنائے جانے کے بارے میں سوال کیا گیا تو انہوں نے کہاکہ’ یہ سب افواہیں ہیں جس دن جاوں گا آپ کو سلام کروں گا۔ ‘
