سرینگر،11اپریل:
کشمیر یونیورسٹی کے سابق پروفیسر اور کشمیر لاء کالج کے پرنسپل ڈاکٹر شیخ شوکت حسین کو ان کے عہدے سے ہٹا دیا گیا ہے۔ ڈاکٹر شوکت سرینگر کے برزلہ علاقے کے رہائشی ہیں۔ حکام کا کہنا ہے کہ وہ کشمیر میں علیحدگی پسندون کے حامی ہیں اور پاکستانی حمایت یافتہ عسکریت پسند تنظیموں کی ترجمانی کیا کرتے تھے۔ حکومت نے گزشتہ شام آئین کی خصوص شقوں کو استعمال میں لاکر عسکریت پسندوں کی اعانت کرنے کی پاداش میں انہیں نوکری سے برطرف کردیا ہے۔
اس سے قبل متعدد سرکاری ملازمین کو علیحدگی پسند سوچ یا نظریات رکھنے اور علیحدگی پسندوں اور شدت پسندوں کی اعانت کے الزامات میں نوکریوں سے برطرف کیا گیا ہے۔بتایا جاتا ہے کہ ڈاکٹر شیخ شوکت سکیورٹی ایجنسیوں کے راڈار پر اس وقت آئے جب انہوں نے دلی میں ایک پروگرام میں شرکت کی تھی جس میں انہوں نے علیحدگی پسند تحریک کی حمایت کی تھی۔ اس پروگرام کے بعد دہلی پولیس نے ان کے خلاف ایک ایف آئی آر درج کر لیا تھا۔ حکام نے ڈاکٹر شیخ شوکت کی سرگرمیوں کے حوالے سیکورٹی ایجنسیوں کی طرف سے جانکاری ملنے کے بعد تحقیقات شروع کردی تھی۔ حکام کی جانب سے اکٹھی کی گئی اطلاعات کے مطابق ڈاکٹر شیخ شوکت سرحد پار ملک دشمن عناصر کے ساتھ لگاتار رابطے میں ہیں جب کہ یہ علیحدگی پسندوں کی حمایت کرتے آئے ہیں۔
ڈاکٹر شیخ شوکت کشمیر کے سرکردہ ماہرین قانون میں شمار کئے جاتے ہیں۔ وہ طویل عرصے تک کشمیر یونیورسٹی کے شعبۂ قانون کے ساتھ وابستہ رہے ہیں اور بین الاقوامی سطح پر کشمیر مسئلے کے سیاسی اور قانونی امورات کے ایک ماہر کی حیثیت سئ جانے جاتے ہیں۔ انہون نے ملیشیا میں بھی کئی سال تک کام کیا ہے۔ شوکت حسین کی آراء اکثر ملکی اور بین الاقوامی میڈیا میں استعمال کیا جاتی ہیں۔حکام کا کہنا ہے کہ ‘ڈاکٹر شیخ شوکت عسکریت حملوں کو جواز فراہم کرنے اور علیحدگی نظریہ کو آگے بڑھانے کا پروپیگنڈہ چلانے میں بھی ملوث تھے۔ اس دوران یہ بھی معلوم ہوا ہے کہ ڈاکٹر شیخ شوکت کو 5 .1 کروڑ بطور تنخواہ ملی ہے جبکہ انہیں 3.2 کروڑ کی اضافی رقم بھی مختلف اخراجات کے تحت ملا کرتی تھی۔ وہیں اب مجاز حکام ان کے پنشن فوائد کو ختم کرنے کے بارے میں بھی غورو فکر کررہی ہیں۔
