سری نگر،30 مئی :
جموں و کشمیر سروس سلیکشن بورڈ کے درجہ چہارم کی نوکریوں کے امیدواروں نے پیر کے روز یہاں پریس کالونی میں جمع ہوکر سیلکشن لسٹ جاری کرنے کے مطالبے کو لے کر احتجاج درج کیا۔
انہوں نے کہا کہ اگر ایک ہفتے کے اندر اندر یہ سلیکشن لسٹ جاری نہیں کیا گیا تو وہ اگلے ہفتے سے بھوک ہڑتال شروع کریں گے۔
احتجاجیوں نے ہاتھوں میں بینرس اٹھا رکھے تھے اور وہ جم کر نعرہ بازی کر رہے تھے۔
اس موقع پر عابد فاروق نامی ایک احتجاجی نے میڈیا کے ساتھ بات کرتے ہوئے کہا کہ سال2020 میں جاری ایک نوٹیفکیشن کے تحت جے کے ایس ایس بی نے درجہ چہارم کی نوکریوں کے لئے 8575 امیدوارں کو بھرتی کیا۔
انہوں نے کہا کہ ان امیدواروں میں سے 5100 امیدواروں کا لسٹ جاری کیا گیا جبکہ 3400 امیدوار رہ گئے۔
ان کا کہنا تھا کہ سال رواں کے ماہ فروری میں لیفٹیننٹ گورنر منوج سنہا جی نے دو ماہ کے اندر اندر باقی امیدواروں کا لسٹ جاری کرنے کا حکم دے دیا لیکن آج تک لسٹ جاری نہیں کیا گیا۔
موصوف نے کہا کہ اگر اس لسٹ کو ایک ہفتے کے اندر اندر جاری نہیں کیا گیا تو ہم اگلے ہفتے سے بھوک ہڑتال شروع کریں گے۔(یو این آئی)
