کوکرناگ،16جون:
جنوبی کشمیر کے ضلع اننت ناگ کے ہانگل گنڈ کوکرناگ میں عسکریت پسندوں اور سکیورٹی فورسز کے مابین گولیوں کا تبادلہ جاری ہے۔ پولیس کے ایک ترجمان نے بتایا کہ جمعرات کی سہ پہر کو سکیورٹی فورسز کو یہ اطلاع موصول ہوئی کہ عسکریت پسند جنوبی کشمیر کے ہانگل گنڈ کوکرناگ گاؤں میں چھپے بیٹھے ہیں۔
پولیس، فوج اور سی آر پی ایف نے مشترکہ طورپر فوراً اس علاقے کو محاصرے میں لے لیا اور اُنہیں ڈھونڈ نکالنے کے لیے کارروائی شروع کی۔ جونہی سکیورٹی فورسز نے تلاشی کارروائی انجام دی تو علاقے میں چھپے عسکریت پسندوں نے سکیورٹی فورسز پر اندھا دھند گولیاں چلائیں جس کے بعد علاقے میں جاری تلاشی مہم نے انکاؤنٹر کی شکل اختیار کر لی۔
ذرائع کے مطابق علاقہ میں دو سے تین عسکریت پسند چھپے ہوئے ہیں۔ تازہ اطلاع کے مطابق دونوں اطراف سے گولیوں کا تبادلہ جاری ہے۔ کشمیر پولیس زون نے آفیشیل ٹویٹر پر انکاؤنٹر کے بارے میں تفصیلات دیں۔ تازہ اطلاعات کے مطابق کوکرناگ کے ہنگلہ گنڈ علاقے میں سکیورٹی فوسز اور عسکریت پسندوں کے درمیان انکاؤنٹر تاحال جاری ہے۔