نئی دہلی: ٹیرر فنڈنگ کیس کے ملزم اور ایم پی انجینئر رشید کے خلاف درج کیس کی سماعت پٹیالہ ہاؤس کورٹ کی خصوصی عدالت میں ہوگی۔ پرنسپل ڈسٹرکٹ اینڈ سیشن جج ومل یادو نے کیس کو ایڈیشنل سیشن جج چندر جیت سنگھ کی عدالت میں واپس بھیج دیا ہے جو پہلے ہی اس کی سماعت کر رہے تھے۔ ایڈیشنل سیشن جج چندر جیت سنگھ 20 دسمبر کو کیس کی سماعت کریں گے۔
پرنسپل ڈسٹرکٹ اینڈ سیشن جج نے یہ حکم اس کیس کے تمام ملزمین اور این آئی اے کی رضامندی کے بعد دیا۔ اس سے پہلے این آئی اے اور رشید انجینئر نے اس کیس کی سماعت پٹیالہ کی خصوصی عدالت میں ہی کرنے پر رضامندی ظاہر کی تھی۔ درحقیقت، 21 نومبر کو ایڈیشنل سیشن جج چندر جیت سنگھ نے رشید انجینئر سے متعلق ایم پی-ایم ایل اے عدالت سے متعلق کیس کو پرنسپل ڈسٹرکٹ اینڈ سیشن جج کو منتقل کرنے کا حکم دیا تھا۔ اس کے بعد کیس کی سماعت پرنسپل ڈسٹرکٹ اینڈ سیشن جج کر رہے تھے۔
ایڈیشنل سیشن جج چندر جیت سنگھ نے کہا تھا کہ اس معاملے کے ملزم رشید انجینئر اب ایم پی بن چکے ہیں، اس لیے اس کیس کی سماعت اس عدالت میں منتقل کی جانی چاہیے جو ایم ایم ایل اے سے متعلق مقدمات کی سماعت کرتی ہے۔ بتا دیں کہ رشید انجینئر نے 28 اکتوبر کو تہاڑ جیل میں خودسپردگی کی تھی۔ 10 ستمبر کو پٹیالہ ہاؤس کورٹ نے رشید انجینئر کو جموں و کشمیر میں انتخابی مہم میں حصہ لینے کے لیے 2 اکتوبر تک عبوری ضمانت دی تھی۔ اس کے بعد عدالت نے راشد انجینئر کی عبوری ضمانت میں دو بار توسیع کی تھی۔ رشید انجینئر نے لوک سبھا انتخابات 2024 میں جموں و کشمیر کے سابق وزیر اعلیٰ عمر عبداللہ کو شکست دے کر کامیابی حاصل کی تھی۔
