شوپیاں: جنوبی کشمیر کے شوپیاں ضلع میں نامعلوم بندوق برداروں نے ایک ٹورسٹ گائیڈ پر فائرنگ کرکے اسے زخمی کردیا جبکہ اس ٹورسٹ گائیڈ کو شوپیاں اسپتال سے سرینگر کے ایس ایچ ایم ایس اسپتال منتقل کردیا گیا ہے۔
تفصیلات کے مطابق ایک غیر ریاستی ٹورسٹ گائیڈ جس کی شناخت ذرائع نے دل رنجیت سنگھ ساکن دہلی کے بطور کی ہے پر نامعلوم افراد نے آج شام دیر گئے شوپیاں ضلع کے پادپاون علاقے میں فائرنگ کرکے اسے زخمی کردیا۔
زخمی ٹورسٹ گائیڈ کو علاج معالجے کے لیے فوری طور پر ضلع اسپتال شوپیاں لایا گیا، جہاں ابتداہی مرہم پٹی کے بعد اسے بہتر علاج معالجہ کے لیے سرینگر کے ایس ایچ ایم ایس ہسپتال منتقل کیا گیا۔
ذرائع سے معلوم ہوا کہ دل رنجیت سنگھ جو دہلی کا رہنے والا ہے ایک ٹورسٹ گائیڈ ہے جو جرمنی سے آئے ہوئے دو سیاحوں کو وادی کشمیر سیر و تفریح کیلئے لایا تھا اور سبھی ضلع شوپیاں کے پادپاون علاقے میں دانس ریزارٹ نامی ایک ہوٹل میں رات کیلئے رکے تھے۔
اس حملے کے بعد پولیس کی طرف سے ابھی تک کوئی بھی بیان سامنے نہیں آیا ہے۔ وہیں سکیورٹی فورسز نے پورے علاقہ کو محاصرے میں لیکر بڑے پیمانے پر حملہ آواروں کی تلاش شروع کی ہے۔
