سرینگر: جموں و کشمیر حج کمیٹی نے خواہشمند افراد سے حج 2025 کے لیے درخواستیں طلب کی ہیں۔ اس حوالے باضابطہ طور ایک نوٹیفکیشن جاری کیا گیا ہے۔ جس کے مطابق 13 اگست یعنی آج سے آن لائن فارم جمع کئے جاسکتے ہیں۔جبکہ فارم جمع کرانے کی آخری تاریخ 9 ستمبر 2024 مقرر کی گئی ہے۔ نوٹیفکیشن کے مطابق خواہشمندوں کو مطلع کیا جاتا ہے کہ آن لائن درخواست فارم داخل کرنے سے پہلے خواہشمند حج کمیٹی کی ویب سائٹ www.hajcommittee.gov.in پر حج 2025 کے لیے دستیاب حج پالیسی اور ضابطہ کا بھی بغور مشاہدہ کریں۔
درخواست دہندگان کے پاس مشین ریڈ ایبل انٹرنیشنل پاسپورٹ ہونا چاہیے جو درخواست کی آخری تاریخ کو یا اس سے پہلے جاری کیا گیا ہو اور اس کی معیاد کم از کم 15 جنوری 2026 تک ہو۔ ادھر حج درخواست فارم صرف حج کمیٹی آف انڈیا کی ویب سائٹ www.hajcommittee.gov.in پر یا گوگل پلے اسٹور پر دستیاب اینڈرائیڈ موبائل ایپ "حج سہولت” کے ذریعے حج ایپ پر آن لائن جمع کیا جا سکتا ہے۔
واضح رہے کہ امسال جموں وکشمیر کے 7 ہزار سے زائد عازمین حج نے فریضہ حج انجام دیا۔ جس میں کئی بغیر محرم کی خواتین بھی موجود تھی۔ وہیں اس مرتبہ سعودی عرب میں ہیٹ اسٹروک کی وجہ سے ملک کی دیگر ریاستوں اور یوٹیز کے ساتھ ساتھ وادی کشمیر سے تعلق رکھنے والے کئی عازمین بھی فریضہ حج انجام دینے کے دوران فوت ہوئے۔
