بیروت: چودہ مہینوں تک اسرائیل اور حزب اللہ کے بیچ جنگ جاری رہنے کے بعد جنگ بندی معاہدہ ممکن ہو پایا۔ لبنان میں جشن کا ماحول تھا۔ لیکن جنگ بندی کے دوسرے ہی دن اسرائیل نے لبنان کے ایک علاقہ پر فضائی حملے شروع کر دیے۔
اسرائیل نے جمعرات کو لبنان پر جنگ بندی معاہدے کے بعد اپنا پہلا فضائی حملہ کیا۔ اسرائیلی فوج کا کہنا ہے کہ اس نے جنوبی لبنان میں جنگ بندی کی خلاف ورزی کرنے والے عسکریت پسندوں کے خلاف کارروائی کی ہے جہاں راکٹ ذخیرہ کئے جا رہے تھے۔
لبنانی حکام نے اسرائیلی مارٹر حملوں اور گولیوں کے پراگندہ واقعات کی بھی اطلاع دی ہے۔ حکام کے مطابق ان حملوں میں دو افراد زخمی ہوئے ہیں جو جنوبی لبنان کی طرف لوٹنے کی کوشش کر رہے تھے۔ لبنان کے سرکاری میڈیا کا کہنا ہے کہ زخمی ہونے والے عام شہری تھے، جب کہ اسرائیلی فوج نے انہیں مشتبہ افراد کے طور پر بیان کیا ہے۔ اسرائیل کا کہنا ہے کہ ان مشتبہ افراد نے اسرائیل اور حزب اللہ کے درمیان جاری جنگ بندی کی شرائط کی خلاف ورزی کی ہے۔
حالانکہ اسرائیلی حملوں میں کسی طرح کا جانی نقصان نہیں ہوا ہے، تاہم یہ حملے جنگ بندی کی اس بے چینی کی نوعیت کی عکاسی کرتی ہے جب جمعرات کو لبنانی فوجیوں نے جنوبی لبنان کے کچھ حصوں، مشرقی وادی بیکا اور بیروت کے جنوبی مضافات میں تعیناتی شروع کردی تھی۔ یہ وہی علاقے ہیں جہاں حزب اللہ نے اپنے کاموں کی بنیاد رکھی ہے۔
لبنانی فوج نے کہا کہ وہ بے گھر ہونے والے شہریوں کو گھروں کو لوٹنے میں مدد کی امید میں عارضی چوکیاں قائم کر رہی ہے اور نہ پھٹنے والے ہتھیاروں کو دھماکے سے اڑا رہی ہے۔
لبنان میں دہائیوں کے بعد ملک کی سب سے مہلک جنگ کے دوران تقریباً 1.2 ملین افراد بے گھر ہوئے ہیں۔ جنگ بندی کے نافذ العمل ہونے کے بعد ہزاروں باشندے اپنے گھروں کو لوٹ رہے ہیں۔
جمعرات کو، اسرائیلی فوج نے ایک بیان میں کہا کہ اس کے فوجیوں نے کئی مشتبہ افراد پر فائرنگ کی جو جنگ بندی کی خلاف ورزی کرتے ہوئے اپنی گاڑیوں میں جنوبی لبنان کے بعض حصوں میں پہنچے۔ بیان میں مزید تفصیلات نہیں بتائی گئیں۔
لبنان کی سرکاری خبر رساں ایجنسی نے کہا ہے کہ سرحد کے قریب واقع گاؤں مارکابا میں اسرائیلی فائرنگ میں دو شہری زخمی ہو گئے۔ اس نے یہ بھی اطلاع دی ہے کہ اسرائیلی ٹینک جنوب میں کچھ دیہاتوں میں کھیتوں کو تباہ کر رہے ہیں۔
اسرائیلی فوج کے عربی زبان کے ترجمان کرنل آویچائے ادرائی نے اعلان کیا کہ دریائے لطانی کے جنوب میں شام پانچ بجے سے لبنانی باشندوں کے لیے رات کا کرفیو نافذ ہے۔
لبنانی فوج نے اسرائیل پر الزام عائد کیا کہ جمعرات کو لبنان پر حملے کرکے اور جنگی طیاروں اور ڈرونز سے لبنان میں نگرانی جاری رکھ کر اسرائیل نے کئی بار جنگ بندی کی خلاف ورزی کی ہے۔ فوج نے وضاحت کیے بغیر کہا کہ وہ متعلقہ حکام کے ساتھ مل کر ان خلاف ورزیوں کی پیروی کر رہی ہے۔
لبنان میں سرحد کے پار اسرائیلی ڈرون کی گونج اور مشین گن سے فائر کی چھٹپٹ آوازیں بھی سنی گئی ہیں۔
حزب اللہ نے اسرائیلی جنگ بندی کی مبینہ خلاف ورزیوں پر کوئی بیان جاری نہیں کیا ہے لیکن حزب اللہ کے قانون ساز حسن فضل اللہ نے ان واقعات کا اعتراف کیا ہے۔ جب صحافیوں نے پوچھا کہ، کیا حزب اللہ جواب دے گی تو وہ محتاط رہے۔ انہوں نے کہا کہ، ہم جلد بازی نہیں کرنا چاہتے، اور حزب اللہ کو اپنے دفاع کا حق حاصل ہے۔
امریکہ اور فرانس کی ثالثی میں اسرائیل اور حزب اللہ کے درمیان ابتدائی دو ماہ کی جنگ بندی کا مطالبہ کیا گیا ہے جس میں مسلح تنظیم سے دریائے لیتانی کے شمال سے پیچھے ہٹنے کی شرط رکھی گئی ہے اور اسرائیلی افواج کو اپنی سرحد کی طرف واپس لوٹنا ہے۔
یہ بھی پڑھیں:
