سری نگر/08؍ستمبر:
لیفٹیننٹ گورنر منوج سِنہا نے آج ایس کے آئی سی سی میں ضلع سری نگر اور سری نگر میونسپل کارپوریشن کی ایک جائزہ میٹنگ کی صدارت کی۔دورانِ میٹنگ لیفٹیننٹ گورنر نے مختلف ترقیاتی کاموں ، ضلع اِنتظامیہ اور میونسپل کارپوریشن کی جانب سے چلائی جارہی سکیموں کی عمل آور ی کی پیش رفت کا جائزہ لیا۔
ضلع ترقیاتی کمشنر محمد اعجاز اور ایس ایم سی کمشنر اطہر عامر خان نے چیئرمیں کو بالترتیب ضلعی اِنتظامیہ اور ایس ایم سی کے مختلف پروجیکٹوں ، سکیموں اور دیگر اَقدامات کے بارے میں تفصیلی بریفنگ دی۔
لیفٹیننٹ گورنر نے شہر کی ہمہ گیر ترقی اور عوامی سہولیات کی ضرور ت پر زور دیا ۔ اُنہوں نے کہا کہ توجہ صرف جمالیات کو بڑھانے تک محدود نہیں ہونی چاہئے بلکہ بنیادی ڈھانچے کو زیادہ صارف دوست اور مفید بنانا چاہئے۔
اُنہوں نے اَفسران کو مشورہ دیا کہ وہ سری نگر میونسپل کارپوریشن کو ایک پائیدار ادار ہ میں تبدیل کرنے کی کوشش کریں اور اِس بات کو یقینی بنائیں کہ عوامی خدمات کی فراہمی کے عمل کو بہتر اور پورے شہر میں اِدارہ جاتی بنایا جائے۔ اُنہوں نے کہا،’’ ایس ایم سی کی طرف سے فراہم کی جانے والی عوامی خدمات کے معیار کو مزید وسعت دینے اور بڑھانے کے لئے آمدنی پیدا کرنے کی خاطر ایک مہم شروع کرنے کی ضرورت ہے۔‘‘
کمشنر ایس ایم سی نے چیئر کو سری نگر سمارٹ سٹی لمٹیڈ کے تحت چلائے جانے والے پروجیکٹوں میں حاصل ہونے والی پیش رفت کے بارے میں جانکاری دی۔
اِس سے قبل لیفٹیننٹ گورنر نے ضلع سری نگر کے 65.15 کروڑ روپے کے 18 ترقیاتی پروجیکٹوں کا اِفتتاح کیا اور اینمل برتھ کنٹرول اینڈ اینٹی ریبیز ویکسی نیشن سینٹر چھترہامہ کا سنگ بنیاد رکھا۔
لیفٹیننٹ گورنر نے متعلقہ محکموں سے مختلف عوامی فلاح و بہبود اور سماجی تحفظ کی سکیموں کے تحت اہل استفادہ کنندگان کو وظائف کی تقسیم کی تفصیلات بھی طلب کیں۔ اُنہوں نے فلاحی سکیموں کے تحت ہدف کو پورا کرنے کے لئے اَفسران کو واضح ہدایات جاری کیں۔ اُنہوں نے ضلع ترقیاتی کمشنر سری نگر کو مزید ہدایت دی کہ وہ رہ جانے والے مستفید کی کوریج کے لئے آئی اِی سی کی وسیع سرگرمیاں اَنجام دیں۔
لیفٹیننٹ گورنر نے زرعی شعبے کی مختلف سکیموں کی صورتحال کا جائزہ لیتے ہوئے متعلقہ اَفسران کو ہدایت دی کہ وہ تمام جموںوکشمیر یوٹی اور مرکزی حکومت کی سکیموں کے فوائد اہل استفادہ کنند گان تک پہنچانے کو یقینی بنائیں۔
اُنہوں نے سری نگر میں روزانہ دودھ کی پیدا وار اور پروسسنگ کی صورتحال کا بھی جائزہ لیا ۔ اِس کے علاوہ مویشیوں میں گلٹی دار جلد بیمار ی سے نمٹنے کے لئے متعلقہ محکمہ کی طرف سے کی جانے والی کوششوں کا بھی جائزہ لیا۔میٹنگ میں جانکاری دی گئی کہ 18دِنوں میں صرف 38 معاملات کی رپورٹ ہے اور مویشیوں کی ویکسی نیشن کا کام پوری تن دہی سے جاری ہے۔
لیفٹیننٹ گورنر نے جل شکتی ، پاور ڈیولپمنٹ ، سکولی تعلیم ، ریونیو ، صنعت و حرفت ، کے وِی آئی بی ، کے وِی آئی سی سمیت مختلف محکموں کے کام کاج کا بھی جائزہ لیا اور متعلقہ اَفسران سے حاصل ہونے والی پیش رفت کی تفصیلات طلب کیں۔
مختلف سٹیزن سینٹرک سروسز کے جائزہ کے دوران جانکاری دی گئی کہ عوامی خدمات کی فراہمی میں بلاجواز تاخیر کے ذمہ دار ہلکاروں کے خلاف مناسب کارروائی کی جائے گی۔تمام شہری مراکز خدمات کو اِنٹگریٹیڈ کمانڈ اینڈ کنٹرول سینٹر کے ساتھ مربوط کرنے کے لئے ہدایات جاری کی گئیں۔
لیفٹیننٹ گورنر کو جہلم ریور فرنٹ کی ترقی کے بارے میں دریافت کرتے ہوئے بتایا گیا کہ اِس منصوبے کے دوحصے اِس برس مکمل ہوجائیں گے ۔ لیفٹیننٹ گورنے پانی پر مبنی مقامی معیشت کو ترقی دینے اور آبی ذخائر اور اس کے ملحقہ علاقوں کو خوبصورت بنانے پر زور دیا۔
بعدمیں لیفٹیننٹ گورنر نے عوامی وفود سے بھی ملاقات کی اور ان کے مسائل اور مطالبات سنے ۔ اُنہوں نے عوامی وفود کے مختلف گروپوں سے مطالبات کی یادداشت وصول کی اور ترجیحی بنیادوں پر ان کے مسائل کے مناسب حل کی یقینی دہانی کی۔
میٹنگ میں میئر ایس ایم سی جنید عظیم متو، چیف سیکرٹری ڈاکٹر ارون کمار مہتا ، ایڈیشنل چیف سیکرٹری محکمہ زرعی پیداوار اتل ڈولو، ایڈیشنل چیف سیکرٹری محکمہ خزانہ وویک بھرد واج ، لیفٹیننٹ گورنر کے پرنسپل سیکرٹری نتیشور کمار، اِنتظامی سیکرٹریوں ، صوبائی کمشنر کشمیر، ڈی آئی جی سی کے آر ، ایس ایس پی سری نگر کے علاوہ لائن ڈیپارٹمنٹوں اور عمل آوری ایجنسیوں کے متعلقہ اَفسران موجود تھے۔
