سری نگر،09اپریل :
جموں و کشمیر کے لیفٹیننٹ گورنر منوج سنہا نے موجودہ سیاحتی سیزن کو کشمیر کی سیاحتی تاریخ کا سنہرا دور قرار دیتے ہوئے کہا کہ گذشتہ چند مہینوں کے دوران 80 لاکھ سیاحوں نے جموں وکشمیر کی سیر کی ہے جس سے گذشتہ بیس برسوں کے ریکارڈ ٹوٹ گئے۔
انہوں نے کہا کہ پروازوں کے آپریشنز نے بھی تمام سابقہ ریکارڈوں کو توڑ دیا ہے۔
انہوں نے کہا: ’ریکارڈ تعداد میں سیاح کشمیر آ رہے ہیں کشمیر کی سیاحتی تاریخ کا یہ سنہرا دور ہے‘۔
ان کا کہنا تھا: ’گذشتہ چند مہینوں کے دوران 80 لاکھ سیاح وارد کشمیر ہوئے ہیں جو پچھلے دس بیس برسوں کے دوران ایک ریکارڈ تعداد ہے‘۔
مسٹر سنہا نے کہا کہ پراوزوں کے آپریشنز نے بھی تمام سابق ریکارڈ ٹوڑ دئے ہیں۔
انہوں نے کہا کہ آج یہاں کے تمام ہوٹلوں کی بکنگ ہوئی ہے اور ملک کی باقی ریاستوں کے لوگوں کو سری نگر کی ہوائی ٹکٹ ملنا مشکل بن گیا ہے۔
موصوف لیفٹیننٹ گورنر نے یہاں نامہ نگاروں کے سوالوں کا جواب دینے کے دوران کہا کہ حکومت جھیل ڈل کو جنگی بنیادوں پر صاف کرنے کے لئے پر عزم ہے۔
انہوں نے کہا: ’پہلی بار حکام اور مقامی لوگ مل کر جھیل ڈل کو صاف کر رہے ہیں اور جھیل ڈل کو گندگی سے صاف دیکھنے کے عہد کے تحت کام کر رہے ہیں‘۔
ان کا کہنا تھا کہ جھیل ڈل کو گذشتہ کئی دہائیوں سے صاف نہیں کیا گیا تھا اور یہ اتنا صاف کبھی نہیں تھا جتنا آج ہے اور اس کا اعزاز انتظامیہ اور مقامی لوگوں کو جاتا ہے۔
مسٹر سنہا نے کہا کہ مرکز نے بجٹ میں 273 کروڑ روپیے جھیل اور نگین جھیل کے تحفظ کے لئے مختص رکھے ہیں جن میں سے 136 کروڑ روپیے جھیل ڈل کے تحفظ و بحالی کے لئے صرف کئے جائیں گے۔
انہوں نے کہا کہ لوگ بہت جلد جھیل ڈل کی کھوئی ہوئی شان و شوکت بحال ہوتے ہوئے دیکھیں گے جس کے لئے یہ جھیل دنیا بھر میں مشہور تھا۔
سری نگر سمارٹ سٹی کے بارے میں پوچھے جانے پر ان کا کہنا تھا کہ ہم سری نگر کو سمارٹ سٹی بنانے کے لئے کام کر رہے ہیں۔ (یو این آئی)
