سری نگر 25 اپریل:
جموں وکشمیر پولیس نے اونتی پورہ میں ’’ہابئیرڈ ‘‘ملی ٹینٹ اور اْس کے ساتھی کو گرفتار کرنے کا دعویٰ کیا جبکہ بارہ مولہ میں کالعدم تنظیم جماعت اسلامی کے نام پر چندہ جمع کرنے کی پادائش میں ایک شخص کو حراست میں لے لیا گیا ہے۔
پولیس کے ایک ترجمان نے بتایا کہ مصدقہ اطلاع موصول ہونے کے بعد 50 آر آر، 110 بٹالین سی آر پی ایف اور پولیس نے رائیس احمد میر ولد عبدالرشید میر ساکن چند ہارا نامی نوجوان کو پستول اوردوسرے قابل اعتراض مواد سمیت دھر دبوچ کر سلاخوں کے پیچھے دھکیل دیا۔
انہوں نے کہا کہ ابتدائی تفتیش کے دوران گرفتار نوجوان نے بتایا کہ لشکر جنگجو حاجی (کوڈ نام ) نے اْس سے پستول دیا اور پانپور قصبے میں کم از کم دو غیر مقامی مزدوروں کو مارنے کا کام سونپا۔ترجمان کے مطابق رائیس کو دو غیر مقامی مزدوروں کو مارنے کے عوض لشکر طیبہ میں باضابط طورپر شامل کرنے کا وعدہ کیا گیا تھا۔
انہوں نے بتایا کہ رائیس میر نے اپنے ایک دوست شاکر حمید بٹ ولد عبدالحمید بٹ ساکن آلوچی باغ سانبورہ سے مدد طلب کی اور موٹرسائیکل بھی مانگی تاکہ ہدف کی نشاندہی کے بعد دہشت گردی کے اس واقعے کو انجام دیا جاسکے۔
ترجمان کے مطابق سیکورٹی فورسز کی بروقت کارروائی کے نتیجے میں نہ صرف ہابئیرڈ ملی ٹینٹ اور اْس کے ساتھی کو گرفتار کیا گیا بلکہ جنگجووں کی منصوبہ بندی کو بھی ناکام بنایا گیا۔پولیس نے اس ضمن میں ایف آئی آر زیر نمبر 43/2022 کے تحت پانپور پولیس تھانہ میں کیس درج کرکے مزید تحقیقات شروع کی۔دریں اثنا بارہ مولہ پولیس نے ممنوع تنظیم جماعت اسلامی کے نام پر چندہ جمع کرنے کی پادائش میں ایک نوجوان کو حراست میں لیا۔
پولیس کے ایک ترجمان نے بتایا کہ مصدقہ اطلاع موصول ہونے کے بعد بارہ مولہ پولیس ، 46 آر آر نے محمد امین گنائی ولد علی محمد ساکن مائیکرو کالونی کانلی باغ بارہ مولہ کو اْس وقت گرفتار کیا جب وہ موٹر سائیکل زیر نمبر JK05G-7856 پر کئی جارہا تھا۔ترجمان نے بتایا کہ مذکورہ نوجوان کے قبضے سے جماعت اسلامی کا ایک رسید بک ، موبائیل فون ، نقدی پندرہ ہزار نو سو روپیہ برآمد کرکے ضبط کئے گئے۔پولیس نے بتایا کہ مذکورہ نوجوان کے گھرکی بھی تلاشی لی گئی اور وہاں سے جموں وکشمیر بینک کے دو پاس بک ، جے کے بینک چیک بک اور جماعت اسلامی کی بک لیٹ کو بھی برآمد کیا گیا ہے۔پولیس نے معاملے کی متعلق ایف آئی آر زیر نمبر 68/2022 کے تحت ایک کیس درج کرکے مزید تحقیقات شروع کی ہے۔پولیس نے عوام الناس سے اپیل کی ہے کہ وہ ملک دشمن اور سماج دشمن عناصر کے بارے میں قانون نافذ کرنے والے ادارے کو آگاہ کریں تاکہ خرمن امن میں رخنہ ڈالنے والے عناصر کے خلاف سخت کارروائی عمل میں لائی جاسکے۔یو این آئی
