سری نگر، 6جون:
شمالی ضلع بارہمولہ کے سوپور پانی پورہ جنگلات میں سکیورٹی فورسز اور عسکریت پسندوں کے مابین جھڑپ میں ایک پاکستانی عسکریت پسند مارا گیا ہے۔ پولیس نے ایک ٹویٹ کے زریعے کہا کہ جھڑپ کے دوران دو غیر مقامی اور ایک مقامی عسکریت پسند بھاگنے میں کامیاب ہوگئے۔
مہلوک جنگجوئوں کی شناخت حنظلہ ساکنہ لاہور پاکستان کے بطور ہوئی ہے ۔ مہلوک کی تحویل سے ایک اے کے47 سمیت05میگزین اور دیگر اسلحہ و گولہ بارود ا بر آمد کیا گیاہے۔
اس سے پہلے پولیس کے ایک ترجمان نے بتایا کہ پیر کی شام سیکورٹی فورسز کو خبر ملی کہ سوپور کے پانی پورہ جنگلی علاقے میں جنگجو چھپے ہوئے ہیں۔
انہوں نے بتایا کہ خبر ملتے ہی پولیس، فوج اور سی آر پی ایف کی مشترکہ ٹیم نے علاقے کو محاصرے میں لے لیا۔ان کا کہنا تھا کہ محاصرہ ڈالتے ہی فائرنگ شروع ہوگئی جس کے بعد فورسز نے آس پاس علاقوں کو محاصرے میں لے کر فرار ہونے کے سبھی راستوں پر پہرے بٹھا دئے۔آخری اطلاعات موصول ہونے تک جنگلی علاقے میں دو طرفہ گولیوں کا تبادلہ جاری تھا۔اس سلسلے میں مزید تفصیلات کا انتظار ہے۔یو این آئی
