سرینگر،27جولائی:
موسمی صورتحال خراب رہنے کے بعد منگل کے روز انتظامیہ کی جانب سے احتیاطی طور پر امرناتھ یاترا کو معطل کیا گیا تھا۔تاہم آج موسم خوشگوار ہونے کے بعد حکام نے یاترا کو پھر سے بحال کر دیا۔
بدھ کے روز پہلگام کے ننون بیس کیمپ میں درماندہ 1262 یاتریوں پر مشتمل ایک قافلے کو امرناتھ گُپھا کی جانب روانہ کیا گیا۔ وہیں یاترا مکمل کرنے کے بعد امرناتھ گُپھا سے 500 یاتریوں کو جموں کی طرف روانہ کیا گیا ہے۔ تاہم حکام نے بالتل سونہ مرگ ٹریک سے فی الحال یاترا کو روک دی ہے۔
آج جو یاترا پہلگام سے سے روانہ ہوئے وہ پشو ٹاپ ،پنجترنی اور شیش ناگ کے مختلف پڑاؤ کو عبور کریں گے، اگر موسمی صورتحال پھر سے ابتر ہوئی تو یاتریوں کو پڑاؤ اور بیس کیمپس میں ٹھہرایا جائے گا۔ دراصل منگل کے روز امرناتھ گُپھا کے اطراف میں شدید بارشیں ہوئی تھی جس سے وہاں پر ایک بار پھر سیلابی صورتحال پیدا ہو گئی تھی۔ تاہم ریسکیو ٹیموں نے فوری طور پر یاتریوں کو محفوظ مقامات پر منتقل کیا، جس دوران کوئی جانی نقصان نہیں ہوا۔ واضح رہے کہ حالیہ دنوں امرناتھ گُپھا کے قریب بادل پھٹنے کا واقعہ پیش آیا، جس میں 16 یاتریوں کو اپنی جان سے ہاتھ دھونا پڑا تھا۔
قابل ذکر ہے کہ سطح سمندر سے 3888 میٹرز کی بلندی پر واقع ایک پہاڑی غار میں گرما کے دوران بننے والی ایک برفانی شبیہ کو شیولنگ سے منسوب کیا جاتا ہے جس کی ہندو عقیدت مند پوجا کرتے ہیں۔ امرناتھ یاتریوں کے لیے اس سال آن لائن ہیلی کاپٹر بکنگ سروس بھی شروع کی گئی ہے۔ 43 دنوں تک جاری رہنے والی یاترا 11 اگست کو ختم ہوگی۔
