نئی دہلی، 31 اگست :
ملک کے معروف کاروباری گوتم اڈانی کی اڈانی گروپ میڈیا کمپنی این ڈی ٹی وی میں اضافی 26 فیصد حصص حاصل کرنے کے لئے 17 اکتوبر کو ایک کھلی پیشکش (اوپن آفر) لانچ کرے گا۔ پیشکش کا انتظام کرنے والی کمپنی جے ایم فنانشل نے بدھ کو یہ معلومات دیں۔ اڈانی گروپ کی اوپن آفر مینجمنٹ کمپنی جے ایم فائنانشل نے اس سے متعلق ایک اشتہار جاری کیا ہے۔ کمپنی کے جاری کردہ بیان کے مطابق، این ڈی ٹی وی میں اڈانی گروپ کے اضافی 26 حصص کی کھلی پیشکش 17 اکتوبر کو شروع ہوگی اور 1 نومبر کو بند ہوگی۔ اڈانی گروپ اس اوپن آفر کے تحت 1.67 کروڑ ایکویٹی شیئر حاصل کرے گا۔ اس کے لئے حصص کی قیمت 294 روپئے فی حصص مقرر کی گئی ہے۔
دراصل، اڈانی گروپ میڈیا کے شعبے میں اپنی مضبوط موجودگی کے لئے جارحانہ انداز میں کام کر رہا ہے۔ اس وقت دنیا کے تیسرے امیر ترین شخص گوتم اڈانی کی اڈانی گروپ میڈیا کمپنی این ڈی ٹی وی کو حاصل کرنے کی کوشش کر رہی ہے۔ اڈانی گروپ نے گزشتہ ہفتے یہ بھی کہا تھا کہ وہ این ڈی ٹی وی میں 29.18 فیصد حصص خریدنے اور 26 فیصد اضافی حصص حاصل کرنے کے لئے کھلی پیشکش لائے گا، جس کے بعد اس کی کل حصص 55 فیصد تک جا سکتی ہے۔
قابل ذکر ہے کہ این ڈی ٹی وی کے بانی پروموٹر پرنئے رائے اور رادھیکا رائے نے 2009 میں تقریباً 400 کروڑ روپئے کا قرض لیا تھا۔ بدلے میں گوتم اڈانی کی کمپنی اڈانی گروپ نے این ڈی ٹی وی میڈیا کمپنی میں 29.18 فیصد حصص خریدنے کا اعلان کیا تھا۔ اس کے علاوہ گروپ نے اس میڈیا ہاؤس میں 26 فیصد حصص کے لئے اوپن آفر لانے کی بھی بات کی تھی جس کے بعد اس کا کل حصص 55 فیصد تک جا سکتا ہے۔ تاہم، این ڈی ٹی وی اور اڈانی گروپ کے درمیان معاہدہ بھارت کے اسٹاک مارکٹ ریگیولیٹر (سیبی) کی منظوری کے معاملے پر التوا کا شکار ہے۔ اسے ابھی تک سیبی کی منظوری نہیں ملی ہے۔
