نئی دہلی۔19؍ جنوری:
ہندوستان نے جمعرات کو کہا کہ وہ ہمیشہ پاکستان کے ساتھ معمول کے پڑوسی تعلقات چاہتا ہے، لیکن ایسے تعلقات کے لیے دہشت گردی اور تشدد سے پاک ماحول ہونا چاہیے۔وزارت خارجہ کے ترجمان ارندم باغچی کے تبصرے اس وقت سامنے آئے جب ایک میڈیا بریفنگ میں پاکستان کے وزیر اعظم شہباز شریف کی طرف سے کشمیر جیسے تصفیہ طلب مسائل کو حل کرنے کے لیے دونوں ممالک کے درمیان مذاکرات کی گزشتہ ہفتے پیشکش کے بارے میں پوچھا گیا۔
مسٹر باغچی نے کہا کہ ہم ہمیشہ پاکستان کے ساتھ معمول کے ہمسایہ تعلقات چاہتے ہیں لیکن اس کے لیے دہشت گردی اور تشدد سے پاک ماحول ہونا چاہیے۔گزشتہ ہفتے متحدہ عرب امارات میں قائم العربیہ نیوز چینل کے ساتھ ایک انٹرویو میں، شریف نے کہا کہ پاکستان نے بھارت کے ساتھ تین جنگوں کے بعد اپنا سبق سیکھ لیا ہے اور اب وہ بھارت کے ساتھ امن سے رہنا چاہتا ہے، بشرطیکہ "ہم اپنے حقیقی مسائل حل کرنے کے قابل ہوں”۔”
میرا ہندوستانی قیادت اور وزیر اعظم (نریندر مودی)کو پیغام ہے کہ آئیے میز پر بیٹھیں اور کشمیر جیسے اپنے سلگتے ہوئے مسائل کو حل کرنے کے لیے سنجیدہ اور مخلصانہ بات چیت کریں، جہاں آئے دن انسانی حقوق کی کھلم کھلا خلاف ورزیاں ہو رہی ہیں۔ بعد ازاں، پاکستان کے وزیر اعظم کے دفتر نے کہا کہ بھارت کے کشمیر پر 2019 کے اقدامات کو منسوخ کیے بغیر مذاکرات ممکن نہیں ہیں۔
