سرینگر،29جولائی:
اجس کے نیشنل کانفرنس اور اپنی پارٹی کے کئی کارکن پیپلز کانفرنس میں شامل ہوئے۔ پارٹی کے سینئر رہنما اور پیپلز کانفرنس چئیرمن کے پولیٹیکل سیکرٹری یاسر ریشی نے نئے ممبران کا والہانہ استقبال کیا۔
یاسر ریشی نے پیپلز کانفرنس میں شمولیت کرنے والے نئے ممبران کا خیرمقدم کرتے ہوئے کہا کہ زندگی کے تمام شعبوں سے تعلق رکھنے والے لوگ پیپلز کانفرنس کو زمینی سطح پر مضبوط اور اسے ایک قابل عمل سیاسی متبادل اور ایک مضبوط سیاسی قوت کے طور دیکھنا چاہتے ہیں جو متاثر کن اور حوصلہ افزا ہے۔
انہوں نے مزید کہا کہ عوام میں پیپلز کانفرنس کی مقبولیت کا اندازہ اس حقیقت سے لگایا جا سکتا ہے کہ نئے اور تجربہ کار لوگ جموں و کشمیر کو غیر یقینی صورتحال، تشدد اور غیر سنجیدہ حکمرانی سے پاک دیکھنے کی امید کے ساتھ پارٹی میں داخل ہو رہے ہیں ۔
پارٹی ترجمان کے مطابق نئے شامل ہونے والوں نے تبدیلی کے لئے پیپلز کانفرنس کے وژن کی ترویج و ترقی اور جموں و کشمیر کو غیر یقینی اور افراتفری کے دلدل سے نکالنے کے لئے عملی طور اور دور اندیشی کے ساتھ پارٹی کے عزم پر اعتماد کا اظہار کیا۔ ان کا کہنا تھا کہ وہ واقعی اس بات پر یقین رکھتے ہیں کہ سجاد لون وہ واحد لیڈر ہیں جو جموں و کشمیر کو موجودہ تعطل سے نکال سکتے ہیں اور کشمیر کے لوگوں کے لئے عملی طور کچھ کرنے کی صلاحیت رکھتے ہیں ۔
پارٹی میں شامل ہونے والوں میں اجس کےسرپنچ محمد یوسف، سرپنچ عبدالرشید خان، ڈپٹی سرپنچ عبد الرشید نجار، پنچ نذیر احمد راتھر، پنچ اعجاز احمد گانی، علی محمد بٹ، منظور احمد راتھر، جی ایم بٹ، حاجی زیت اللہ، غلام احمد راتھر، بشیر احمد ڈار سمیت دیگر کارکنان بھی شامل ہیں ۔
