سرینگر /30اپریل / نیشنل کانفرنس نائب صدر عمر عبداللہ نے آج صبح سیلابی ریلوں اور سیلاب کی زدہ میں آئے ہندوارہ، کپوارہ اور سوپور کے دیہات کا تفصیلی دورہ کیا اور حالات کا جائزہ لیا
انہوں نے جگہ جگہ پر مقامی لوگوں سے بات چیت کی اور نقصانات کا جائزہ بھی لیا۔ اُن کے ہمراہ پارٹی کے صوبائی صدر ناصر اسلم وانی، سینئر لیڈر چودھری محمد رمضان، شمالی زون صدر جاوید ڈار، ضلع صدر کپوارہ قیصر جمشید لون، میر سیف اللہ ،انچارج کانسچونسی لنگیٹ شفقت وٹالی اور انچارج کانسچونسی سوپور ارشاد رسول کار کے علاوہ دیگر عہدیداران بھی تھے۔ عمر عبداللہ نے انتظامیہ پر زور دیا ہے کہ سیلابی صورتحال سے نمٹنے کیلئے جنگی بنیادوں پر اقدامات اُٹھائے جائیں اور جن لوگوں کو گذشتہ دو روز سے محفوظ مقامات پر منتقل کیا گیا ہے اُن کے قیام و طعام کا بندوست کیا جائے۔ انہوں نے انتظامیہ پر زور دیا کہ وہ جو سڑکیں سیلابی ریلوں کی وجہ سے ڈیہہ گئیں ہیں ان کی فوری مرمت کیلئے ٹھوس اور کارگر اقدامات اٹھائے جائیں۔ عمر عبداللہ نے کہا کہ گذشتہ 3روزہ بارشوں اور سیلابی ریلوں کی وجہ سے بہت ساری جگہوں پر بجلی اور پینے کے پانی کی سپلائی کا نظام درم برہم ہوکر رہ گیا ہے اور لوگوں کی راحت کیلئے اس پر جنگی بنیادوں پر کام ہونا چاہئے۔اس کے علاوہ فوری طور پر ٹیمیں تشکیل دیکر نقصانات کا تخمینہ لگاکر متاثرین کی امداد کاری کی جائے اور ساتھ ہی جن لوگوں کے مکانات، کو نقصان پہنچا ہے اُن کی مالی معاونت کی جائے ۔
اس کے علاوہ عمر عبداللہ نے حکومت سے لقمہ اجل بنے افراد کے لواحقین کے حق میں بھر پور ایکس گریشیا ریلیف فراہم کرنے اور زخمی ہوئے افراد کو بہتر سے بہتر علاج و معالجہ فراہم کرنے کا بھی مطالبہ کیا۔ادھر پارٹی جنرل سکریٹری حاجی علی محمد ساگر نے بھی ضلع انتظامیہ سرینگر سے نشیبی علاقوں سے پانی کی نکاسی کیلئے اقدامات اُٹھانے کی اپیل کی ہے۔ انہوں نے کہا کہ سمارٹ سٹی کے نام پر تمام سڑکوں کو کھنڈرات میں تبدیل کردیاگیا ہے جس کی وجہ سے لوگوں کا عبور و مرور اور ٹرانسپورٹ زبردست متاثر ہورہا ہے۔
انہوں نے حکومت سے بجلی سپلائی میں بہتری کی بھی اپیل کی ہے۔جنرل سکریٹری نے پارٹی سے عہدیداروں اور کارکنوں کو ہدایت کی کہ وہ اپنے اپنے علاقوں میں رہ کر لوگوں کی خدمت میں پیش پیش رہیں۔
