سری نگر/لیفٹیننٹ گورنرمنوج سِنہا نے جیشٹھ اشٹمی کے موقعہ پر ماتا کھیر بھوانی مندر تولہ مولہ گاندربل میں یاتری بھون کا سنگ بنیاد رکھا۔
اُنہوں نے ماتا کھیر بھوانی میں حاضری دی اور سب کی سلامتی ، خوشحالی ، ترقی اور بھلائی کے لئے دعا کی ۔اُنہوں نے عقیدتمندوں سے بات چیت کی اور اِس موقعہ پر دِل کی گہرائوں سے مُبارک باد دی۔
لیفٹیننٹ گورنر نے میڈیا اَفراد سے خطاب کرتے ہوئے ماتا کھیر بھوانی کے عقیدتمندوں کے لئے سہولیات کو بڑھانے کے لئے یوٹی اِنتظامیہ کے عزم کا اعادہ کیا۔
اُنہوں نے کہا کہ یاتری بھون 3.85 کروڑ روپے کی لاگت سے تعمیرکیا جائے گااور یاتری بھون آرام دہ رہائش اور صفائی ستھرائی کی سہولیات فراہم کرکے یاترا کے تجربے کو بہتر بنائے گا۔ اُنہوں نے مزید کہا کہ اگلے 8 ماہ میں بھون مکمل کیا جائے گا اور اِس میںزائد اَز ایک ہزار یاتریوں کی گنجائش ہوگی۔
لیفٹیننٹ گورنر نے میلے کے اَحسن اِنعقاد کے لئے ضلع اِنتظامیہ ، ریلیف کمشنر آفس ، پولیس اور سیکورٹی فورسز اور تمام شراکت داروں کی کوششوں کی بھی ستائش کی۔
اُنہوں نے کہا کہ اس برس میلہ کھیر بھوانی میں زائد اَز 30,000 عقیدتمندوں نے شرکت کی ۔اُنہوں نے کہا کہ جموں سے تقریباً 200 بسیں آئی ہیں اور اِنتظامیہ اور شہریوں نے عقیدتمندوں کو بہترین ممکنہ سہولیات فراہم کی ہیں۔
لیفٹیننٹ گورنر نے گاندربل کے تولہ مولہ میں واقع پوتر مندر کے دورے کے دوران کشمیری پنڈت برادری کے ارکان سے بھی بات چیت کی اور مختلف امور پر تبادلہ خیال کیا۔
اِس موقعہ پر چیئر پرسن ڈی ڈی سی گاندربل محترمہ نزہت اشفاق،صوبائی کمشنر کشمیر وِجے کمار بدھوری ،سیکرٹری محکمہ دیہی ترقی و پنچایتی راج ڈاکٹر شاہد اِقبال چودھری،ضلع ترقیاتی کمشنر گاندربل شیامبیر ، سول اور پولیس اِنتظامیہ کے سینئر افسران اور عقیدتمندوں کی بڑی تعداد موجود تھی۔
