بھونیشور:جمعہ کی شام اڈیشہ کے بالاسور ضلع میں بہنگا اسٹیشن کے قریب دو ایکسپریس ٹرینوں کے ٹکرانے اور پٹری سے اترنے سے270 مسافروں کی موت جبکہ 900 سے زیادہ زخمی ہو گئے ہیں اڈیشہ کے بالاسور ضلع کے بہنگا بازار اسٹیشن پر 12841 اپ چنئی شالیمار کورومنڈل ایکسپریس اور 12864یشونت پور ہاوڑہ سپر فاسٹ ایکسپریس ایک کے بعد ایک پٹری سے اتر گئیں اور اس حادثہ میں کم از کم 270 لوگوں کی موت اور 900سے زائد افراد زخمی ہوگئے ہیں۔
اوڈیشہ کے سرکاری حکام نے بتایا کہ اس حادثے میں 900 سے زیادہ زخمی ہوئے اور متعدد کی موت ہو گئی ہے۔وزیر اعظم نریندر مودی، لوک سبھا اسپیکر اوم برلا نے حادثے پر افسوس کا اظہار کیا ہے۔
ریلوے بورڈ کے حکام نے بتایا ہے کہ 12841 اپ شالیمار ایکسپریس شام 7 بجے کے قریب پٹری سے اترگئی جس کے چند منٹ بعد 12864 اپ ٹرین آئی اور پٹری سے اترے ڈبوں سے ٹکرا کر وہ بھی پٹری سے اتر گئی۔ اس سے اپ اور ڈاؤن دونوں راستوں پر ٹریفک متاثر ہوا۔
ریلوے بورڈ کے چیئرمین اور سی ای او انل کمار لاہوتی فوری طور پر جائے حادثہ کے لیے روانہ ہو گئے ہیں جب کہ ریلوے کے وزیر اشونی ویشنو، مڈگاؤں-ممبئی وندے بھارت ایکسپریس کے افتتاح کے لیے گوا پہنچنے پر حادثے کی اطلاع ملتے ہی واپس دہلی روانہ ہوگئے ہیں اور یہاں سے اڈیشہ جائیں گے۔
ریلوے بورڈ کے ذرائع نے بتایا کہ 12841 اپ شالیمار ایکسپریس شام 7 بجے کے قریب پٹری سے اترگئی اور اس کے 7 کوچ دوسری سمت والی پٹری پر الٹ گئے جس کے چند منٹ بعد 12864 اپ ٹرین آئی اور کورومنڈیل ایکسپریس کی پٹری سے اترے ڈبوں سے ٹکرا گئی جس سے اس کے بھی دو کوچ پٹری سے اتر گئے۔ حادثے کے باعث اپ اور ڈاؤن دونوں راستوں پر ٹریفک بند ہے۔ ریلوے حکام نے ہیلپ لائنز کے نمبر بھی مشترک کئے ہیں۔
اوڈیشہ حکومت کی طرف سے بتایا گیا ہے کہ این ڈی آر ایف کے 22 ارکان کی ایک ٹیم اور کٹک جنکشن سے 32 ارکان کی ایک اور ٹیم کو حادثے کے بعد راحت اور بچاؤ کے لیے جائے حادثہ پر بھیجا گیا ہے۔ این ڈی آر ایف کی تین ٹیمیں، اوڈیشہ ڈی آر اے ایف کی چار یونٹس اور 60 ایمبولینسیں روانہ کی گئیں۔
وزیر اعلیٰ کے دفتر سے یہ بھی بتایا گیا ہے کہ اس حادثے میں کم از کم 30 لوگوں کی موت ہوئی ہے۔ جبکہ 47 زخمیوں کو بالاسور میڈیکل کالج میں داخل کرایا گیا ہے۔ 132 زخمیوں کو سورو، گوپال پور اور کھانتا پاڑا کے صحت مراکز میں منتقل کیا گیا ہے۔
بالاسور میڈیکل کالج سے ڈاکٹر بھیجے گئے۔ اطلاعات کے مطابق دس زخمی مسافروں کو بالاسور میڈیکل کالج پہنچایا گیا۔ریسکیو آپریشن میں مقامی لوگ پولیس اور فائر بریگیڈ کی ٹیم کی مدد کر رہے ہیں۔دریں اثنا، حکام نے بالاسور میں ایک ہنگامی کنٹرول روم قائم کیا ہے اور ایک ایمرجنسی نمبر 06782262286 جاری کیا ہے۔
