سری نگر/لیفٹیننٹ گورنر منوج سِنہانے آج سری نگر میں محترمہ نروپما کوٹرو اور شانت نو رے چودھری کی کتاب ’’دی سوئنگنگ 70 کی دہائی۔دی سٹارز، سٹائل اینڈ سبسٹینس اِن ہندی سنیما‘‘ کا اجرأ کیا۔
اُنہوں نے اَپنے خطاب میں مدیرین محترمہ نروپما کوٹرو اور شانت نو رے چودھری اور پبلشر اوم بکس کو اس بہترین کتاب کی اِشاعت کے لئے مُبارک باد پیش کی۔
لیفٹیننٹ گورنر نے کہا،’’سنیما صرف تفریح اور کاروبار کے بارے میں نہیں ہے۔ یہ سماجی تبدیلی کے لئے ایک طاقتور ذریعہ ہے ۔ہمارے فلم سازوں نے شاندار کمرشل فلموں اور متوازی سنیما کے مشہور کاموں کے ذریعے تفریح اور سماجی ذِمہ داری کے درمیان توازن قائم کرنے کی کوشش کی ہے۔ یہ ثقافتی اَقدار کی عکاسی کرتا ہے اور اس نے ہمیشہ قوم کی تعمیر میں اہم کردار اَدا کیا ہے۔‘‘
اُنہوں نے کہا کہ یہ کتاب قارئین کے لئے ہندی سنیما کے 70 کی دہائی کے دور کو دوبارہ دیکھنے کے لئے گیٹ وے کا کام کرے گی۔لیفٹیننٹ گورنر نے جموں و کشمیر کے سنیما کی دُنیا کے ساتھ خصوصی تعلق پر بات کرتے ہوئے کہا کہ فلموں اور تھیٹر نے ہمیشہ سماجی و اِقتصادی تبدیلی میں کلیدی کردار اَدا کیا ہے۔
اُنہوں نے جموں و کشمیر میں فلم ماحولیاتی نظام کو بحال کرنے کے لئے یو ٹی اِنتظامیہ کی کوششوں پر بھی روشنی ڈالی۔
لیفٹیننٹ گورنر نے کہا،’’فلم ساز وادی میں واپس آ رہے ہیں۔ شاندار ثقافت، دِلفریب مناظر، عالمی معیار کی سہولیات اور فلم سے متعلق بنیادی ڈھانچے نے جموں کشمیر کو سب سے پسندیدہ فلم شوٹنگ مقام کے طور پر کھڑا کیا ہے۔‘‘اُنہوں نے کہا کہ’ جے اینڈ کے فلم پالیسی‘ نے جموںوکشمیر یوٹی میں ایک متحرک فلمی ماحولیاتی نظام بنایا ہے اور جموںوکشمیر میں فلم سازی کو آسان بنانے کے لئے اِنتظامی مدد فراہم کی ہے تاکہ فلموں کی شوٹنگ کے لئے ترجیحاً 2 سے 4 ہفتوں کے اندر سِنگل وِنڈو سیل قائم کر کے اِجازت دی جاسکے۔
لیفٹیننٹ گورنر نے کہا کہ فلم کی شوٹنگ کی بحالی اور سنیما ہالوں کی واپسی نے جموں کشمیر کے باصلاحیت نوجوانوں کے لئے کاروباری مواقع پیدا کئے ہیں۔ اُنہوں نے کہا کہ ہمیں اُمید ہے کہ فلم اِنڈسٹری کے ذریعے جموں کشمیر میں سرمایہ کاری کو راغب کیا جائے گا تاکہ روزگار کے زیادہ سے زیادہ مواقع پیدا ہوں اور یہ سیاحت کو فروغ دینے میں بھی اہم کردار اَدا کرے گا۔
اِس موقعہ پر لیفٹیننٹ گورنر نے عوام سے پُراَمن اور خوشحال جموں کشمیر کی تعمیر کی حکومت کی کوششوںمیں مدد کرنے کی اپیل کی۔
’’دی سوئنگنگ 70 کی دہائی‘‘ میں مضامین کا ایک مجموعہ پیش کیا گیا ہے جو 70 کی دہائی کے دور کی بے شمار جہتوں جیسے فیشن، موسیقی، فلموں کی مختلف اصناف، مشہور ستارے اور پردے کے پیچھے کی ناقابل سماعت کہانیاں کی عکاسی کرتا ہے۔
اِس موقعہ پر چیف سیکرٹری اَتل ڈولو ، ڈی جی پی آر آر سوائن،ایڈیشنل چیف سیکرٹری جل شکتی ڈیپارٹمنٹ شالین کابرا،پرنسپل سیکرٹری محکمہ ثقافت سریش کمار گپتا، سینئراَفسران،مدیران اور پبلشرز، معروف اَدبی شخصیات اور آرٹ اور فلم کے شائقین کی ایک بڑی تعداد موجود تھی۔
