ویب ڈیسک
عالمی شہرت یافتہ انڈین اداکارہ اور پروڈیوسر پرینکا چوپڑا نے بالی وڈ کے مداحوں کو خوش خبری دی ہے کہ وہ بولی وڈ کی فلم میں کام کرنے کا ارادہ رکھتی ہیں۔
عرب نیوز کے مطابق ریڈ سی انٹرنیشنل فلم فیسٹیول میں ایوارڈ حاصل کرنے کے بعد پرینکا چوپڑا نے بالی وڈ سے اپنی محبت کا اظہار کرتے ہوئے کہا کہ ’وہ 2025 میں انڈین فلموں میں واپس آئیں گی۔‘
سابق مس ورلڈ نے جدہ میں ریڈ سی انٹرنیشنل فلم فیسٹیول میں شرکت کے دوران بتایا کہ ’مجھے انڈیا میں فلم کیے ہوئے چھ، سات سال ہو چکے ہیں، میں انڈین رقص، زبان اور ثقافت کو بہت یاد کرتی ہوں۔‘
امریکی فلم انڈسٹری ہالی وڈ میں اپنی کامیابی کے باوجود انہوں نے واضح کیا کہ ’وہ ہالی وڈ اور بالی وڈ دونوں فلم انڈسٹریز میں ہمیشہ سے کام کرنے کی خواہش رکھتی ہیں۔‘
سٹار اداکارہ نے کہا کہ ’دنیا کی دو سب سے بڑی فلم انڈسٹریز میں کام کرنے کا موقع ایک اعزاز ہے اور میں اس پر فخر محسوس کرتی ہوں۔‘
پرینکا چوپڑا نے 2024 میں ہالی وڈ میں اپنی مصروفیات اور آنے والے پروجیکٹس کے بارے میں بتایا کہ ’میں نے ایمیزون پرائم ویڈیو کی سیریز ’سیٹڈل‘ کے دوسرے سیزن اور ایکشن فلم ’دی بلف‘ کی شوٹنگ مکمل کرلی ہے۔‘
ہالی وڈ فلم ’دی بلف‘ میں پرینکا چوپڑا ایک خاتون قزاق کا کردار نبھا رہی ہیں جو تاریخی خواتین بحری قزاقوں کی حقیقی کہانیوں سے مبنی ہے۔ یہ فلم ایک عورت کی اپنے خاندان کو بچانے کی جدوجہد پر بنائی گئی ہے۔
پرینکا چوپڑا جوناس نے بالی وڈ میں ’ ڈان 2 ‘ اور ’کرش‘ جیسی ہٹ فلموں سے شہرت حاصل کرنے کے بعد ’بے واچ‘ اور ’دی میٹرکس ریزریکشنز‘ جیسی فلموں کے ذریعے ہالی وڈ میں اپنی جگہ بنائی۔
