سری نگر 04 اپریل:
جموں وکشمیر کے پہاڑی ضلع شوپیاں کے چھوٹی گام حرمین علاقے میں پیر کی شام کو مشتبہ جنگجووں نے کشمیری پنڈت پر فائرنگ کی جس کے نتیجے میں وہ شدید طور پر زخمی ہوا ہے۔سرکاری ذرائع نے بتایا کہ پیر کی شام مشتبہ جنگجووں نے حرمین شوپیاں میں ایک کشمیری پنڈت پر فائرنگ کی جس وجہ سے وہ شدید طور پر زخمی ہوا ہے۔زخمی کشمیری پنڈت کی شناخت سونو کمار بالا جی ساکن چھوٹی گام کے بطور ہوئی ہے۔
ہسپتال ذرائع نے بتایا کہ زخمی شہری کی حالت خطرے سے باہر ہے۔ حملے کی اطلاع ملتے ہی پولیس، فوج اور سی آرپی ایف نے مشترکہ طورپر حرمین شوپیاں اور اْس کے ملحقہ علاقوں کو محاصرے میں لے کر حملہ آوروں کی بڑے پیمانے پر تلاش شروع کی ہے۔
بتادیں کہ پچھلے چوبیس گھنٹوں کے دوران وادی کشمیر میں جنگجویانہ سرگرمیوں اچانک اضافہ دیکھنے کو ملا ہے۔اتوار کی شام کو لیتر پلوامہ اور پیر کے روز پلوامہ کے ہی لاجورہ علاقے میں چار غیر مقامی باشندوں پر فائرنگ کی گئی جس کے نتیجے میں وہ شدید طورپر زخمی ہوئے۔پیر کی سہ پہر کو سری نگر کے مائسمہ علاقے میں حفاظت پر مامور پیرا ملٹری فورسز کے اہلکاروں پر گھات لگا کر حملہ کیا گیا جس وجہ سے ایک اہلکار زخموں کی تاب نہ لا کر چل بسا جبکہ دوسرے کی حالت خطرے سے باہر بتائی جارہی ہیں۔
رمضان المبارک کا مقدس مہینہ شروع ہوتے ہی ملی ٹینٹوں کی جانب سے حملوں میں تیزی لائی گئی ہے جس کے پیش نظر پوری وادی میں سیکورٹی کو الرٹ پر رہنے کے احکامات صادر کئے گئے ہیں۔یو این آئی
