سری نگر، 6جون:
جموں وکشمیر پولیس کا کہنا ہے کہ سالانہ امر ناتھ یاترا کے دوران سری نگر- جموں شاہراہ پر یاتریوں کی مدد کے لئے ریسکیو ٹیمیں تعینات کی جائیں گی۔
پولیس کے ایک ترجمان نے بتایا کہ سری نگر- جموں شاہراہ پر چونکہ چٹانیں کھسکنے کا خطرہ لاحق رہتا ہے جس کے پیش نظر پُر خطر راستوں پر ریسکیو ٹیمیں تعینات کرنے کا فیصلہ لیا گیا ہے۔
انہوں نے بتایا کہ ایس پی رام بن موہیتا شرما کی صدارت میں منعقدہ اعلیٰ سطحی میٹنگ کے دوران فیصلہ لیا گیا کہ سری نگرأ جموں شاہراہ سلائڈ زدہ علاقوں میں جموں وکشمیر پولیس کی خصوصی ٹیمیں تعینات کی جائے گی۔
اُن کا کہنا تھا کہ شاہراہ پر قبل از وقت ہی اضافی اہلکاروں کی تعیناتی کا فیصلہ لیا گیا ہے تاکہ سماج دشمن عناصر کے منصوبوں کو ناکا بنایا جاسکے۔
موصوف ترجمان کے مطابق موصوف ایس پی نے پولیس ، سیکورٹی فورسز اور دیگرقانون نافذ کرنے والے اداروں سے وابستہ افسران و اہلکاروں پر زور دیا کہ وہ یاترا کے دوران باہمی تال میل کو بنائے رکھیں۔
معلوم ہوا ہے کہ حالیہ شہری ہلاکتوں کے بعد مرکزی وزیر داخلہ کی سربراہی میں منعقدہ میٹنگ کے دوران فیصلہ لیا گیا کہ یاتریوں کی حفاظت کے لئے تین دائروں والی سیکورٹی تعینات کی جائے گی ۔
ذرائع کا کہنا ہے کہ سالانہ امر ناتھ یاترا کو خوش اسلوبی کے ساتھ پایہ تکمیل تک پہنچانے کی خاطر امسال 250پیرا ملٹری فورسز کی کمپنیاں وادی وارد ہوں گی۔
گذشہ ہفتے لگ بھگ ایک سو کمپنیاں کشمیر وارد ہوئی ہیں اور آنے والے دنوں کے دوران مزید کمپنیاں امر ناتھ روٹوں پر تعینات کی جارہی ہیں۔
43 دنوں پر محیط یہ سالانہ یاترا ماہ رواں کی 30 تاریخ سے شروع ہونے والی ہے۔ (یو این آئی)