اننت ناگ،22اگست:
جموں و کشمیر کے ضلع اننت ناگ کے سنگم علاقہ میں مشتبہ عسکریت پسندوں نے سی آر پی ایف کے بنکر پر گرینیڈ حملہ کیا۔ تفصیلات کے مطابق جنوبی کشمیر کے ضلع اننت ناگ کے سنگم میں سی آر پی ایف بنکر پر گرینیڈ پھینکا گیا ہے۔ گرینیڈ نشانہ سے چوک پر سڑک پر پھٹا جس کے نتیجہ میں دو عام شہری سمیت ایک سی آر پی ایف اہلکار زخمی ہوئے ہیں۔
پولیس ذرائع کے مطابق مشتبہ عسکریت پسندوں نے سنگم کے مقام پر سی آر پی ایف کے 136BN بٹالین بنکر پر گرینیڈ پھینکا۔ تاہم دستی بم مطلوبہ جگہ سے چوک گیا اور سڑک کے کنارے پھٹ گیا۔ حملے میں دو عام شہری سمیت ایک سی آر پی ایف اہلکار معمولی طور پر زخمی ہوئے ہیں۔
پولیس افسر کے مطابق زخمیوں کی شناخت عامر احمد لون ولد محمد عبداللہ اور شکیل احمد لون ساکن ناٹی پورہ سنگم کے طور پر کی ہے۔ زخموں کو نزدیکی ہسپتال منتقل کیا گیا۔ حملے کے فوراً بعد سکیورٹی فورسز نے حملہ آوروں کو پکڑنے کے لیے پورے علاقے کو گھیرے میں لے لیا اور تلاشی کارروائی شروع کی۔
